Khlad u nongialehkai, ba shah tynrah kali ha Shangbangla

Shillong: Uwei u rangialehkai Tenis uba la tip kyrteng kum u D.Vishwa, uba la thmu ban wan sha ka jylla na ka bynta ban leit iashimbynta ha ka 83rd Senior National Table Tenis Championship ka ban sa long ha Nongbah Shillong, u la khlad noh na sla pyrthei, kata hadien ba kawei ka Tourist Taxi kaba u shong, ka la shah tynrah ha kawei ka trok hapoh ka surokbah NH-6, kaba hap ha ki bynta ka shnong Shangbangla, Ri Bhoi.

Ha katei ka jingjia aksiden, nalor ka jingkhlad utei u rangialehkai, la ong ruh ba wat u nongniah jong katei ka Tourist Taxi (Swift D-zire) kaba don ia u number AS-25-CC-8413, u la khlad noh. La ong ba katei ka jingjia aksiden, ka la jia ha ka por 1:50 baje ei ei mynta mynsngi, ha kaba la ong ba katei ka Tourist Taxi, ka dei kaba thmu ban kiew sha Shillong na Guwahati, hynrei haba ka la poi ha katei ka jaka, ka la shah tynrah noh ha kawei ka trok kit Klinker kaba don ia u number AP-16-TH-1393, kaba thmu ban hiar sha Guwahati.

Haba iadei bad katei ka jingjia aksiden, la ong ba ka daw baroh ka dei namar ba u nongniah jong katei ka trok, u la pynher stet palat ia katei ka trok, ha kaba ynda u la poi ha katei kaba kham long khongdong, um lah shuh ban tehlakam ia ka kali kaba u niah, kumta katei ka trok ka la kam noh sha shilliang ka surokbah NH-6 bad ha kum katei ka por, ka la kum leit tynrah beit ia katei ka Tourist Taxi. Utei u rangialehkai Tenis lem bad u nongniah, kiba la mynsaw eh ha katei jingjia aksiden, la rah noh mar mar ia ki sha Nongpoh Civil Hospital bad tang katto katne por la ong ba ki la khlad noh na sla pyrthei, namar ba la jur palat ka jingmynsaw.

Ka Meghalaya Table Tennis Association (MTTA) ka pynpaw ïa ka jingsngewsih kaba khraw ïa ka jingkhlad ba kyndit u nonglehkai, na Tamil Nadu ha ka jingïaid lynti ban poi sha Shillong ban shim bynta ha ka 83rd Senior Table Tennis Championship.

U Deendayalan Vishwa ryngkat ki lai ngut ki rang lehkai na Tamil Nadu ki ïa kynduh noh ka jingïatyngkhuh ka kali tourist taxi kaba ki shong bad kawei ka trok 12 taïar ha Shangbangla Ribhoi.

Kumba ha ka por 1:50 noh sngi kane ka trok ka dang pyrshang ban cross na kawei ka liang bad dei ha kane ka por ba ka leit tyngkhuh ïa kane ka kaba ki shong. U Vishwa u la khlad noh ha lynti katba dang rah ïa u sha Nongpoh Civil Hospital, katba ki lai ngut pat la pynkit noh marmar sha NEIGRIMS, Shillong bad mynta ki la lait na ka jingma.

U kpa lem bad kiba ha ïing u Vishwa kin poi ha Nongpoh lashai ka sngi ban shimti noh ïa ka met jong u.