U nongialam rangbah jong ka seng Congress uba dei ruh u Lat barim jong ka jylla Meghalaya u M.M Jacob u la khlad noh mynta ka sngi u blei ha kawei ka Hospital shimet kaba don ha ka jylla Kerela. La ong ba u Jacob uba la 90 snem karta u la khlad noh na ka jingpang tymmen jong u. U Jacob u dei ruh u myntri sorkar pdeng barim bad uba la shakri kum u Deputy Chairman ka Rajya Sabha ha ki snem 80. U dei uba la bat ia ki kam bapher bapher hapoh ka seng Congress, u la long teng u treasurer jong ka Kerala Pradesh Congress Committee bad Chairman, Kerala State Seva Dal Board bad u dei u dkhot ba shah jied jong ka AICC bun bun snem. Ia ka met jong u yn pynkhuid lashai ka lah sngi u blei. Shibun ki jingsngewlem ki la tuid halor ka jingkhlad noh jong u kiba kynthup ruh na u myntri rangbah duh ka Ri u Narendra Modi.