Khlad u khynnah, uba dang 13snem ka rta, naba ngat bih, na ka bam ba khawai holi

Uwei u khynnah, uba na Meghalaya, ula khlad noh, hynnin ka sngi, na ka daw jong ka jingngat bih na ka bam, ha kawei ka skul kaba don ha Malavalli ha Mandya district bad sa shibun ngut kiwei pat ki iohpang na katei kajuh ka daw, ong ka khubor.

Ka khubor, kaba la pynmih ha ka Hindu, ka kotkhubor kaba na Tamilnadu, ka iathuh, ba utei uba iap, u dei U Kerlang, uba dang 13 snem bad ki don kiwei pat ki lad khubor, kiba iathuh ba utei u khynnah, u dei uba na ka shnong Lyndem, kaba ha Pynursla Civil Sub Division.

U Mohan, uba dei u District Health Officer (DHO) jong ka Mandya, u iathuh ba ki don ki nongkhaii kiba na Rajasthan, kiba shong ba sah ha Malavalli, ki la pynlong ia ka jinglehniam holi bad ka jingiabam khawai, ha ka sngi thohdieng ba ladep bad ka la don ka jing iakhawai da ka ja jhur, ha kawei ka hotel, kaba don hangtei hajan bad kumta la sam ia katei ka bam sha kito ruh kiba sah ha ki hostel, kiba don marjan bad katei ka kynthup ia ki 24 ngut ki samla pule, kiba na ka thain shatei lam mihngi, kiba sah hangtei hajan.

Mar ia dep ia katei ka bam, la iathuh ba kiba bun na kitei ki samla, ki la ioh pang prie bad pynhiar bad ki briew jong ka tnat ka koit ka khiah, ki la leit peit ia katei ka skul, ba ki sah kitei ki samla bad ki la rah ruh mar mar ban ai jingsumar ia ki bad la iathuh ba hynnin ka sngi U Blei, U Kerlang, ula kyllon ha ka kamra ba u sah bad ula iap, ha shwa ba ki doktor kin leit ban ai jingsumar. Ki don kumba 30 haduh 40ngut na kitei ki khynnah skul, kiba bam ia katei ka bam, ki la ioh pang bad kitei ki don ha ka jingshah sumar ha Mandya, Mysuru bad ha kiwei de ki jaka, ong U Mohan.

U Deputy Commissioner u Kumara, u iathuh ba ki kmie ki kpa jong utei uba iap bad kiba pang, la dep phah khubor kyrkieh bad la iathuh ruh ba katei ka skul, ka don tang ki khynnah skul sngi bad kam dei satia, kaba la ioh jingbit ba kin don kiba sah hapoh katei ka skul bad kam don jingbit ruh ban pyniaid ia ka hostel, ong shuh ka khubor. U Kumara, u iathuh ba ki bor distrik, kin tian bishar ia katei ka skul, halor katei ka jingjia bad ki pulit ka Malavalli, ki la sdang ban tohkit, halor katei ka jingjia.