Khlad u Jonga Bahadur, ba shah syllad ka kali ialam lynti ia u heh shipai ha Nongpoh

Nongpoh, 11 Rymphang: Uwei u rangbah ba la 69 snem ka rta bad uba la tip kum u Jonga Bahadur, na ka shnong Shangbangla ha Ri Bhoi, u la khlad noh na sla pyrthei bad kata ka dei hadien ba utei u rangbah, u la shah syllad ha kawei ka kali kaba ialam lynti ia u heh shipai jong ka Assam Rifles.

Katei ka jingjia shah syllad kali ia utei u rangbah, ka la jia ha ka por 10 baje ei ei mynstep bad kaba la jia ha ki bynta jong ka surokbah NH-6 mar pyrshah bad ka ophis u Deputy Commissioner ka Ri Bhoi, ha kaba kawei ka kali kaba ialam lynti ia u heh shipai ka Assam Rifles kaba don ia u number ML 05 Y-3232, ka la leit ban syllad ia utei u tangbah, uba dang thmu ban kam na shilliang sha shilliang ka surok lyngba ka Bisikil.

Ka tyllong khubor na ki Pulit ka Ri Bhoi, la ong ba utei u rangbah uba la shah syllad ha katei ka kali ba ialam lynti ia u heh shipai, u dei u briew uba im ha ka kam ban leit sam dud sha ki briew bad uba la mad ia katei ka jingjia shah syllad ha katei ka kali ki shipai ha ka por ba ki thmu ban hiar na Nongbah Shillong sha Guwahati.

Hadien ba utei u rangbah u la mynsaw na katei ka jingjia shah syllad ha katei ka kali, nyngkong la rah noh ia u sha Nongpoh Civil Hospital, hynrei namar ba la jur eh ka jingmynsaw, la pynkynriah noh ia u sha ki jaka sumar kiba kham biang sha Nongbah Shillong, hynrei kham hadien pat la ioh ia ka khubor ba utei u rangbah u la khlad noh na sla pyrthei hapoh kawei na ki jaka sumar ha Nongbah Shillong.