Khlad U Bah OL Nongtdu

Shillong, 08 Jymmang:
U Bah Onward L. Nongtdu uba long u  MP barim ka Rajya Sabha na Shillong bad u nongïalam ka Seng Congress bad u Myntri barim ka Sorkar Jylla u la khlad noh ha ka sngi saitjaiñ hadien ka jingpang kaba la bat la slem.
U Bah Nongtdu u la don 78 snem  ka rta,  la khlad ha ka por kumba 7.15 baje mynstep.
La kha ïa u Bah Nongtdu ha ka 8 tarik, Jymmang, 1938 ha ka shnong Sutnga, East Jaiñtia Hills District. U la pyndep ïa ka jingshong skul ha Sutnga bad Jowai bad pyndep ïa ka kyrdan BA na Shillong. Shwa ba un iasoh sha ka sain pyrthei, u la long u Headmaster ka Sutnga Presbyterian High School haduh u snem 1972.
U la shah jied MLA ha u snem 1983 bad 1988 bad kum u MP ka Rajya Sabha naduh snem 1996 haduh 2002.
U Bah Nongtdu u la long ruh u President barim ka Meghalaya Pradesh Congress Committee (MPCC) naduh u snem 1996 – 2000 bad naduh u Ïaiong 2005 haduh u Nailur 2008.
Na ka liang u President ka MPCC u Bah DD Lapang u lapynpaw ia ka jingsngewlem ia ka jingkhlad noh jong u Bah Nongtdu. U la ong ba ka jingkhlad noh jong une u nongialam, ka long ka jingduh kaba khraw ia ka party bad ia ka jylla.