Nongpoh: Uwei u pulit jong ka 4th Battalion, uba la tip kyrteng kum u Benidict Maring (39) snem ka rta, uba dei na ka shnong Mawphrew kaba don ha ki thain Marngar, u la khlad syndet noh hynne ka step, kata ha ka por kaba u dang leit ban mareh step.
Ka jingkhlad jong utei Pulit ha ka por kaba u dang mareh step, ka la jia ha kawei ka lynti shnong ka dong Downgate ha Nongpoh Proper, ha kaba utei u Pulit ha ka por kaba u dang mareh, kynsan kynsan u la shu kyllon ha katei ka lynti kaba u mareh bad hadien kata, ki para Pulit ki la rah noh ia u sha Nongpoh Civil Hospital, hynrei haba la poi ha katei ka jaka sumar, ki doktor ki la pynbna ba u la khlad noh.
Haba la leh ia ka post mortem, la ong ba ka jingkhlad syndet utei u Pulit, ka lah ban dei namar ka jingsangeh treikam u klongsnam (Heart Attack). Kumta haba iadei bad katei ka jingkhlad kaba syndet utei u Pulit, ki Pulit ki la pyndep ia baroh ki jingtohkit bad hadien kata ki la aiti noh sha kiba haiing, khnang ba kin ioh ban pyndep ia ka jinglehniam kaba khatduh.
Phi don ban ong eiei?