Khlad sa uwei, ba bthei ka Tanker umphniang

Jowai, 13 Nohprah:
Ka jingjia kem ding bad bthei ka kali kit umphniang ha Mookhep, East Jaintia Hills ka la shim biang sa kawei ka jingim ba kordor jong uba la mynsaw jur.
Ka khubor ka la iohlum ka la iathuh ba mynta ka step ha ka por kumba 11:30 am eiei, u Dame Ryngkhlem uba la mynsaw jur u la khlad noh ha kawei ka jaka sumar (hospital) dawai kymbat jong u riew shimet kaba don ha Takhniang thain Nongjngi Elaka East Jaintia Hills.
La iathuh ba hadien katei ka jingjia kaba la jia haka sngi Palei ba la dep, ia u Dame Ryngkhlem la kit sha katei ka jaka Sumar ha ryngkat uwei pat, u Piros Shadap uba shnongkha ha ka meisan jong utei u Dame.
Hadien ka jingkhlad noh u Dame, Ia u Piros ruh la kynriah noh mynta hi ka sngi sha NEIGRIMS, Shillong ban ioh jingsumar na ki Doctor. Baroh kitei kiba la khlad noh bad kiba la mynsawjur na katei ka jingjia kidei kiba na Wapungskur, East Jaintia Hills.
Ha ka sngi Saitjain ba la dep u Marius Sumer uba na katei ka juh ka shnong u la khlad noh ha iing.
Kumban shu pynkynmaw, katei ka trok kit umphniang katba ka dang wan na thain Guwahati ban leit sha thain Silchar ka la kylla ha Mookhep bad ki paidbah kiba da ki phew ngut ki la tur sha jan katei ka trok ba kylla ban pdiang umphniang petrol kaba la jaw bad shlei sha madan. Katba ki dang iaknieh pdiang umphniang, kyndit katei ka trok ka la kem ding bad la suba jur ba don ba dih biri, duma ne sikret bad bun ngut kiba pdiang umphniang bad kiba don hajan jong katei ka kali ki la mynsaw.