Khlad noh u shipai Khasi, ba ialeh laitluid ia ka Ri Bangladesh

Shillong:Ka Coordination Committee of Indo Bangla Riwar People, ka pynpaw ia ka jingsngewlem, halor ka jingkhlad noh jong U bah Africa Suting, uwei na ki shipai Khasi, uba don bynta ha ka jingialeh laitluid jong ka Bangladesh ha u snem 1971.

Ha ka kyrwoh sha kiba ha iing, na ka liang ka komiti, ka sngew kitram shibun, halor ki kam radbah jong utei u rangbah, ha kaba ka komiti, ka la pyndon burom ruh ia u, ha U Risaw 2021, ha shnong Mawryngkang.
Yn tep donburom ia U bah Africa Suting, lashai ka sngi, ka 2tarik Nohprah 2023, ha ka jingpyniaid ka balang katholik, ha Awla Punjee ha Bangladesh bad la iathuh, da u khun jongu, U bah Dewi Khonglah, ba ka jingle burom, na ka liang ka Balang bad ka iing, kan long ha ka por 12baje shiteng sngi, katba ki shipai jong ka Bangladesh, kin leh burom ia utei u rangbah, ha ka por 1baje nohsngi,ong ka kyrwoh, na U bah RM Shabong, Chairman, Coordination of Indo Bangla Riwar People.