|
U Father Joseph Cilia SDB, ula khlad noh mynta ka sngi, ha ka jingshah sumar ha Nazareth Hospital, ha ka por 3.30 mynstep. Ka jingleit on tep don burom ia u, kan long ha ka 11tarik Nohprah 2018, ha Cathedral of Mary Help of Christian ha ka por 1.30 nohsngi, ha kaba yn ialam ia ka jinglehniam da U Rev Archbishop Dominic Jala sdb bad yn tep ia u, ha u lum jingtep Catholic ha Laitumkhrah. U Father Joseph, u don ka jingpang la katto katne snem, ha ryngkat bad ka jingnoh ka rta jongu.
U Father Cilia, u dei uba na ka nongbah Malta, u dei u khun jong U Francis bad ka Michalina Cilia, ha kaba la kha ia u, ha ka 30tarik Kyllalyngkot 1936 bad u don ia ka jingthmu ban trei ia ka kam U Blei, ha kaba la ju tip ruh ia u, kum u samla jong ka thain shatei lam mihngi. Ula pyniasoh ialade bad ka kynhun Salesian of Don Bosco ha u snem 1954 bad ula mih na Malta ban wan sha India, ha u snem 1956 bad ula shimti kum U Lyngdoh niam ha u snem 1966 ha Shillong, da U (L) Archbishop S Ferrando, SDB. Ula trei ha ki jaka bapher ha Meghalaya bad Assam, ha kaba ha u snem 1966 u trei ha Don Bosco Guwahati, ha ki snem 1969-1970 ha Sohra, ha ki snem 1970-1972 ha Pynursla, ha u snem 1972 ha Cathedral Parish Laitumkhrah, ha ki snem 1972-1977 ha Jongksha Parish, ha ki snem 1977-1980 ha Christ King College, ha ki snem 1980 – 1983 ha STC bad ha u snem 1983, u shimti kum U Director ka Don Bosco Youth Centre in Shillong. U Father Cilia, ula ioh ruh ia ka khusnam Meghalaya State Award for Social Service ha u snem 2000.  |