Khlad noh u Dr Bajubon R Kharlukhi, u ba dei u Tymmen basan bad u MP barim

Shillong: U Dr Bajubon R Kharlukhi, uba dei U MP barim ka Lok Sabha bad uba dei ruh u tymmen basan u la khlad noh na kane ka sla pyrthei ha ka 25 tarik u bnai Nohprah 2021 bad ka jingleit ontep donburom, ka long ha ka 27 tarik u bnai Nohprah 2021 ha u lum jingtep jong ka Balang Presbyterian Mawlai.

U Dr Bajubon R Kharlukhi, u dei u kurim jong ka Kong Pamela War bad uba shong ba sah ha Mawlai Iewrynghep.

Kum ban shu pynkynmaw u Dr Bajubon R Kharlukhi, u dei uwei napdeng ki nongialam jong ka seng All Party Hill Leader’s Conference(APHLC) ban mih madan bad iakhun na ka bynta ban pynioh jylla bapura. Ia u Dr Bajubon R Kharlukhi la kha ha ka 8 tarik u bnai Risaw 1939. U Dr Bajubon R Kharlukhi, u la pule ha St Anthony’s College Shillong bad i la pule pyndep shuh shuh ia ka jingpule jong u na Gauhati University ha kaba u la ioh ia ka Ph.D, na katei kajuh ka University. Ha u snem 1966 u Dr Bajubon R Kharlukhi u la pyndep ia ka Assam Civil Service. U la long ruh kum u Headmaster jong ka Langtor Government Aided High School ha u snem 1964. Dei ha ka snem 1983, u Dr Bajubon R Kharlukhi, u la shah jied kum u MP ka Lok Sabha jong ka Shillong Parliamentary Constituency bad ia katei ka elekshon u la jop na ka seng APHLC. Ym tang katta, u Dr Bajubon R Kharlukhi u la long ruh kum u Principal jong ka UCC College, u nongseng bad u Principal jong ka Mawlai Presbyterian Higher Secondary School bad kumjuh ruh jong ka Mawlai Presbyterian College. Ha ka 25 tarik u bnai Risaw 1987, u Dr Bajubon R Kharlukhi u la shah jied kum u Tymmen Basan jong ka Balang Presbyterian Mawlai. Ha u snem 1966, u Dr Bajubon R Kharlukhi u la long ruh kum u Secretary Shnong jong ka Mawlai Iewrynghep bad ha ki snem 1981 haduh 1983 u la bat ruh kum u Rangbah Shnong jong ka Mawlai Iewrynghep.