Khlad hashen u shynrang bad ka kynthei, ba rung rung khrum trok ka thuk thuk ha Shangbangla

Nongpoh: Uwei u shynrang ba dang 23 snem bad ka kynthei ba dang 21 snem ka rta, kiba dei na ka jylla Assam, ki la duh noh ia la ka jong ka jingim bad kata ka dei hadien ba ka thuk thuk kaba ki shong, ka la rung ha khrum trok ha ka por ba ki thmu ban kiew sha Meghalaya.

Katei ka jingjia aksiden ba sngewsih ia kitei ki arngut, ka la jia mynta ka sngi u Blei ha ka por 10 duna baje ei ei mynstep, kaba la jia ha surokbah NH-6 bad kaba hap hapoh u pud u sam ka shnong Shangbangla, Ri Bhoi.

U shynrang uba la khlad u dei uba la tip kum u Nilutpal Dowari na Sarupather, Dibrugarh bad katei ka kynthei ka dei kaba la tip kum ka Gargee Chutia na Gadadhar Singha Path Joytipur, ha kaba ki la kiew sha Meghalaya da kaba ki la wan da kawei ka thuk thuk kaba don ia u number AS-01-FF-3367.

Katei ka thuk thuk bad ka trok kaba don ia u number AS-01-RC-0413, ia kaba la niah da u Helmi Suting, ki don ha kajuh ka lynti ban kiew sha Shillong, hynrei haba la poi ha katei ka jaka ha Shangbangla, kaba dei ruh ka jaka ba kham long khongdong, katei ka thuk thuk ia kaba la niah da u Nilutpal Dowari, ka la kham stet bad haba la poi ha katei ka jaka, um shym la lah shuh ban tehlakam ia la ka thuk thuk, kaba la pynlong ia katei ka thuk thuk kaba u niah, ba kan rung ha khrum trok bad shah iuh ha ki taiar dien ka trok, kaba la pynlong syndon ia kitei ki arngut ba kin khlad noh hashen.

Tang mar ia tip halor katei ka jingjia, ki Pulit ki la leit mar mar sha katei ka jaka bad haba ki la lap ba ki la khlad noh hashen, ki la rah noh ia ki sha jaka buh metiap kaba don ha Nongpoh Civil Hospital Nongpoh.