Khlad hashen u nongniah thuk thuk ba ka trok 16-shaka hakhmat ka Toll Gate ha Pahammawlein

Nongpoh, 11 Lber: Uwei u nongniah thuk thuk uba niah ia ka thuk thuk kaba don ia u number AS-04-Y-0825, u la khlad noh hashen bad kata ka dei hadien ba u la shah iuh ha kawei ka trok 16-shaka, kaba don ia u number AS-01-SC-5581 bad kaba la jia mynta ka sngi ha ka por 12:30 baje ei ei nohphai sngi hakhmat ka Toll Gate kaba don ha shnong Pahammawlein 20mer.

Katei ka thuk thuk bad kumjuh ruh ka trok, ki dei kiba don ha ka lynti ban kiew na Nongbah Guwahati sha Shillong, hynrei hashwa ba kin rung sha Toll Gate la jia katei ka jingjia aksiden, tad haduh ba utei u nongniah jong katei ka thuk thuk u la khlad noh hashen, namar ba u la shah iuh ha ki bynta ka khlieh.

Na kaba la iathuh da kiba la sakhi ia katei ka jingjia, la ong ba nyngkong katei ka trok ka la iuh da ka taiar khmat bad haduh ba utei u nongniah thuk thuk, u la sahkut ha ki bynta ka taiar pdeng jong katei ka trok 16-shaka.

Haba iadei bad katei ka jingjia aksiden, ki Pulit ka Byrnihat Police Outpost, mar mar ki la poi ha katei ka jaka, na bynta ban pynlong ia ka jingtohkit bad kiba la shimti noh ia katei ka Metiap bad ruh ban rah noh ia katei ka trok sha thanad.