Khlad hashen ka longkmie ba iuh ka trok ha Nongpoh

Nongpoh, 04 Nailur:
Ha kawei ka jingjia aksiden ba sngew sih kaba la jia mynta ka sngi ha Nongpoh, ha kaba kawei ka longkmie kaba la khlad noh hashen hadien ba ka la shah iuh ka kawei ka trok kaba don ia u no. ML 04A 8496.
Kane ka jingjia ka la jia mynta ka sngi ha ka por 7 baje ei ei mynstep, hadien ba katei ka long kmie ia kaba la tip kyrteng kum ka Kong Triwlis Syiem, ka dang thmu ban leit sha ka dukan kaba don ha Nongpoh hi, hynrei katba ka dang iaid ha lynti khlem poi pyrkhat katei ka trok ka la wan ban tynrah tad haduh ba kan da duhnoh ia la ka jingim.
Tang mar iatip halor jong katei ka jingjia, ki pulit ka Nongpoh Police Station mar mar ki la leit sha katei ka jaka, na ka bynta ban pynlong ia ka jingtohkit.
Kumta tang hadien katto katne por ki bor pulit ki la ioh ban bat noh ia katei ka trok ha Umling, katba ia u nongniah jong katei ka trok kim shem la ioh ban kem namar u la phet noh na katei ka jaka.
Haba iadei bad kane, na ka liang ki pulit ki la rah noh ia katei ka metiap sha Civil Hospital Nongpoh, na ka bynta ban leh Postmortem bad ka jingtohkit halor kane ka jingjia kan dang iaid shakhmat.