Khlad hashen 2 ngut ba kylla ka trok ha Sumer

Nongpoh, 04 Naiwieng:
Ar ngut ki briew ba kynthup ia u draibar bad nongbud jong kawei ka trok kaba don ia u number NL 01 G- 8151 ki la khlad noh hashen, hadien ba katei ka trok ka la kylla ha kawei ka riat kaba don hajan ka shnong Sumer, Ri Bhoi District.
Kane ka jingjia ka la jia mynta ka sngi ha ka por 2 baje janmiet, ha kaba katei ka trok kaba mih na Jowai da ka jingthmu ban hiar sha Guwahati, hynrei ynda ki la poi ha Sumer katei ka trok ka la kylla noh sha riat bad kaba la pynlong ia u nongniah bad nongbud ba kin khlad noh hashen.
Ka tyllong khubor na ki pulit, la ong ba ia ka kyrteng bad ka jaka sah jong kitei kiba la iap ym tip, hynrei ia kitei ki metiap la rah noh sha Nongpoh Civil Hospital na ka bynta ka postmortem bad ka jingtohkit ki pulit kan dang iaid shakhmat.