Khlad ha shen u nongniah trok ha ka jingjia aksiden ki trok hajan Umeit

Nongpoh: Ha kawei ka jingjia aksiden kaba la jia hynnin ka sngi ha surok Shillong By-pass bad kaba hap ha ki bynta jong ka shnong Umeit bad Umdohbyrthieh.

Katei ka jingjia ka la jia ha ki por shiteng sngi, ha kaba kawei ka trok kaba kit Klinker kaba don ia u number AS-01-GC-1274 bad kaba wan na ki thaiñ Jowai, ka la kylla bad syllad ia kawei ka trok thylli kaba don ia u number ML-05H-1872, ka trok kaba wan na ka liang pyrshah, hynrei ha katei ka jingjia u nongniah jong katei ka trok kaba kit Klinker, u la khlad noh hashen hadien ba ka trok ka la ban ia u.

Ha katei ka jingjia aksiden hapdeng kitei ki trok, ka la wanrah ruh ia ka jingsahkut kali kaba jur, namar baroh ki kali kiba thmu ban kiew ne hiar kin iohlad shuh ban ïaid, namar kitei ki trok ki la pakhang ia katei ka surok Shillong By-pass.
Ki Pulit tang mar ia ïoh jingtip halor katei ka jingjia, ki la leit mar mar sha katei ka jaka, na ka bynta ban weng ia ka jingdheng kali bad ban tan noh ia kitei ki trok.