B.M.Lanong
Ka la long ka jingsngewsih shisha, ba u trai ka Bethany Hospital, u Dr. John Sailo Ryntathiang ula khlad noh na ka khlam coronavirus ha ka lah shiteng miet jong ka 14 tarik mynta u bnai ha NEIGHRIMS bad khlem pynslem, la rah thang noh hi ia ka met jong u ha ka 15 tarik sha Electric Crematorium, ha Mawprem, ha kaba yn sa leit tep pat ia u dpei jong ka met jong u sha ka jaka sah jong u sha Nongpoh, kumba u ju thrang.
U budlum ki paidbah te ula shah nion shisha laki-laka, namar la khang lut naduh u Lber 2020 ia ki lad ki lynti kiba ju don, khamtam ha ka liang ka ioh ka kot (Economy), haba kum ki nongrep, ia ki mar rep lajong ruh ym lah pyniaid iew kumba ju long, ban thied ruh ym don lad, haba sah kut ki mar ki mata bad khang ki iew ki hat. Mynta lei la nang pynjlan ia ka khang-khyrdep (Lockdown) shaduh ka 3.5.2020 syndon.
Katno eh ita i khaw MLA, MDC in lah kyrshan, haba ia kiwei kiwei ki jingdonkam, kum ka umphniang, ka shini, slasha, u dai, u ata, ka doh ka keh bad kiwei ruh ki jingdonkam ban thied, la thut lut ki lad. Don pat ba wat lada don lad ban thied ruh, ym don ba die. Ki nongtied khor ruh ki la syllang, bun kiba la ud ‘air-lock’.
Nga ju kob, ba bun ki nongkyndong jong ngi ki lah ban im da ki snem lada wan kum kine ki por. Uba kham iap hi, dei u nongsor, namar um long ban shu bam da ka pisa.
Hynrei ha ki por kiba kum kine, ba ka Corona kam ithuh nongsor ne nongkyndong, baduk ne basuk, bhabriew ne katba long, baroh ki shem la ki jong ki jingeh bapher-bapher.
La khang sa ki Kashari bishar, ki skul bad jaka pule, baroh ki jait jingialehkai, ka tem ka put, ki kam jngoh pyrthei bad ki ophis trei kam. Lada don kiba plie, la pyniaid da ki rukom juk on-line, kiba nion hi ia ki baduk-babieit.
Wat ia ka bynta jong ka bneng ruh, hap mane bad duwai ha la ing. Ym pat ju kynmaw koit, ban duh kat ia ka Good Friday bad Easter (Paskha), kaba long ka jingleh niam bakhraw tam ki Kristan. Ki khlam 100 snem shisien, 1720, 1820 bad 1920, ki la dakhol ia ki bynta jong ka pyrthei. Kane mynta ruh kan sah iathuh khana ia kine ki jingjia kiba ngi mad.
Don ka ktien kaba ong, ‘Thab met ia u ksuid,’ lada u dawa jingiaroh. Kane mynta te kadei ia ka Sorkar MDA u CM Conrad Sangma, ia baroh ki Minister ka kynhun Cabinet jong u, ia u Speaker Bah Metbah Lyngdoh bad ia baroh ki MLA ka ing Dorbar Meghalaya, kynthup ia baroh ki MDC, ia ki nongtrei Sorkar, kynthup ia ki pulit, khamtam ia ki ophis DC, SDO bad kiwei kiba ia trei shitom miet bad sngi, thik kum ki shipai hapdeng ka thma.
Ka sorkar ka la shim shisha baroh ki lad jingiada ha ki por kiba biang. Don lei kiba iohsngew ba haduh 12:30 -1 baje mynstep ruh ki kali DIPR ki dang wan pynbna khubor sha ki shnong ki thaw, ban phah husiar ia ki paidbah ba kin ym iatur jan than (social distancing) bad kiwei-kiwei ki jingbthah.
Tieng Bieit Ia I Corona ym long
Ine i Corona ibym imab iano-iano, hynrei ban iaher mynsiem lymwir kam long, namar lah ban pynkoit lyngba ki jingsumar babiang. Ha ka phlim Sholay, U Amitabh u ong, “Jo dar gaya, samjho mar gaya.” Kito kiba khawpud, khein ba ki la iap lypa, ka long kaba don jingmut.
Naduh ka 24.03.2020, ynda la nang nion kane ka khlam Corona, ia kaba ka WHO ka ai ruh da ka kyrteng Covid-19, kumba don ar-lai kyrteng ki briew, ka Sorkar India ka la pynjari syndon da kata ka khang khyrdep ha baroh kawei ka ri India, 3 taiew lynter naduh ka 24.03.2020 bad mynta la pynjlan shuh shaduh ka 3.5.2020. Yn ym don liengsuin, ym don rel, kiban iaid ha ri India ha kine ki por.
Bun bah shisha ki jingeh kiba ki paidbah ki iakynduh. Shim shuwa tang ia ka jylla Meghlaya lajong, dang bun ki briew kiba don sha kiwei ki jylla ha la kijong-kijong ki jingleit, kiba hap sah sha ki jaka ba ki don. Hynrei ha ka sngi Ba-ar 14 tarik mynta u bnai, ka Sorkar India ka la rai ban iarap pynpoi ing ia kino-kino kiba leit trei shabar jylla. Ka Sorkar Meghalaya ka dei ban shim kabu ban pynpoi ia kino-kino ki trai jylla kiba sahkut shabar.
Ym dei ban don shuh kiba shah beh ing, ne shah leh jot kum ia u bapli u samla Aldrin Lyngdoh uba ha ka sohsat marwei, u pynkut syndon la ka jingim ha ri nongwei. Tip sa uei pat uta u samla uba kynthih syndon na aspatal Bethany sha wah Thangsniang, tip na kaei ka daw, ka long kaba pang mynsiem ban iohsngew.
Ka Jingjia ha Bethany
Ha kum kine ki por, kiba kit kam ki hap ban kham phikir namar kumno ki don kita kiba ioh rung thymmai sha ki thain Madanriting, Nongthymmai bad shawei-shawei? Ym dei ban shah shuh, khamtam ia ki Shipai ne ki nongtrei Sorkar ba kin kynriah nawei-shawei.
Wat ia ki Ambulance, dei ban husiar bha, namar uta u pyrsa u Dr. Sailo uba wan sha Meghalaya ha ka 22.3.20 da ka Ambulance na Gauhati, hana um lei lei(negative). Kumno pat u kthaw bapli u iap ei, kiwei ki dkhot ka ing ruh hana ki la bit lang?
Ki shipai India ki pyndonkam bha ia ka tien pynbrai (slogan) ‘Tagra Raho’ khamtam ha ki por ba kum kine, ba baroh kiba don ha ka sorkar kin nang iaid shaphrang ha ka jingshlur mynsiem ban pyndep ia ki kam kiba sah.
Ia kito pat kiba ‘air lock’ ha kane ka por khang kyrdep ‘down lock’ ka jingbthah ha kum kane ka por ka long, ‘thiah kloi, khie step,’ pyrshang kjit noh da ka lyer khuid shuwa ban thiah bad ynda khie mynstep. U piat u rynsun ha ka por thiah u iarap bha lada ‘air lock’ ka khmut ne u pdot. Iaid kai step hajan hajan ban long barabor kiba ‘Tagra Raho’
U President ka America u Donald Trump uba ju sngew Tagra Raho, u syllad beit, ba un weng noh kloi ia kine ki jingpyrkhing ha America, na kaei kaba kiwei ki pyrkhat. U ong ruh ba, um ngeit ia ki doctor bad ki Officer jong u, ba kiba pang bad baiap ha America ki long kumba kdew ma ki.
Jingpang, Jingkoit bad Jingiap Corona haduh 15.04.2020
| Ki Ri | Kiba ioh Corona | Kiba la koit | Kiba la iap |
| US America | 614180 | 49857 | 26061 |
| Spain | 177633 | 70853 | 18579 |
| Italy | 162488 | 37130 | 21067 |
| China | 82245 | 77816 | 3342 |
| Pakistan | 5988 | 1446 | 107 |
| India | 11439 | 1306 | 377 |
INDIA
| Delhi | 1,561 | 30 | 30 |
| UP | 660 | 50 | 5 |
| W.Bengal | 213 | 37 | 7 |
| Assam | 32 | 0 | 1 |
| Mizoram | 1 | 0 | 0 |
| Meghalaya | 1 + | 0 | 1 |
Phi don ban ong eiei?