Khlad ba shah shoh ha basa tympew

Shillong, 11’lyngkot:
U samla Edwin Lyngdoh Mawphlang uba ju khot sin kum u Bobby uba shong basah ha Mawlai Nongkwar bad uba die dohkha ha iewduh u la khlad noh ha NEIGRHIMS Hospital namar ka jingmynsaw jur hadien ba u shah shoh ha ki runar ha basa tympew ha Iewduh. Katkum ki khubor ba la iohlum la iathuh ba ha ka por 9 baje mynmiet ki runar ki la hiar thma bad thombor ia u Bobby ha basa tympew ha ka miet sngi hat majai bad ki la mait da u sdie na ki bynta jong ka khlieh.
Tang mar ia ioh jingtip ia kane ka seng HYC ka la buddien halor katei ka jingjia bad hadien ka jingtip kaba thikna ki dkhot katei ka seng ki la leit kem ia ar ngut ki briew na ingsah jong ki, kiba donkti ha katei ka kam.
Ki ar ngut kiba la shah kem ki dei kiba la tip kyrteng kum u Hunlangki Thabah (21 snem karta) uba shong basah ha Mawlai Nongkwar Patarim bad uwei pat dei u Stubarius Kurbah (20 snem karta) ba shong basah ha Upper Shillong -Pynthor.
Ki nongialam ka seng HYC ki la leit ban aiti ia kitei ar ngut sha Lumdiengjri PS.