Nongpoh: Uwei u Rangbah u la khlad noh bad Lai ngut kiwei pat ki nongshong ha kawei ka Maruti Van kaba don ia u number ML-10B-6223, ki la mynsaw jur, hadien ba katei ka kali kaba ki shong, ka la iatyngkhuh bad kawei ka Kali kit kali ha surok NH-6 kaba hap hapoh ka shnong 19Mer ha Ri Bhoi.
Ka jingtip kaba la iohlum, la ong ba katei ka jingjia mynha ka miet Sngi Thohdieng, ha ka por 9:30 baje ei ei mynmiet, ha kaba katei ka Maruti Van, kaba kiew na ki thain Byrnihat, ka la iatyngkhuh bad katei ka kali kit kali kaba don ia u number AS-25EC-2060.
La ioh jingtip ruh, ba ka daw kaba la pynlong ia katei ka jingjia aksiden, ka dei namar ba katei ka kali kit kali, ka la wan na ka liang bym dei (Wrong Side) bad kaba la wanrah syndon ia katei ka jingjia aksiden kaba sngewsih bym poi pyrkhat.
Ia utei u rangbah uba la khlad noh na katei ka jingji aksiden, la tip kyrteng kum u Bah Koparsil Suting bad kitei kiba la mynsaw la tip kum u Parksiar Suting, u Alberin Suting lem bad uwei u bym pat shem la ioh kyrteng.
Tang mar ia jia katei ka aksiden, ki Pulit ki la leit mar mar sha katei ka jaka bad iarap ruh ban pynpoi sha ki jaka sumar ha Nongpoh, hynrei haba la poi ha Nongpoh, utei u rangbah u la khlad noh, katba ia kitei ki laingut kiba mynsaw la pynkit noh mar mar sha Nongbah Shillong, na ka bynta ban ioh ia ka jingsumar kaba kham biang.
Haba iadei bad katei ka jingjia, na ka liang ki Pulit ka Ri Bhoi, kin dang pynlong ia ka jingtohkit bad khamtam eh ban thwet ia u Nongniah jong katei ka Kali kit kali, uba la phet krad noh tang mar ia jia katei ka aksiden.
Phi don ban ong eiei?