Khihwin puk ka shnong Umsarang, ba leh khlieh shrieh ki riew shimkabu bad ki briew na Hima Khyriem

Nongpoh: Mynta ka sngi ka la don ka jingialum paidbah ha shnong Umsarang, Ri Bhoi bad kata ka long ban pynshai halor ka jingkynnoh kaba la mih, halor kata ka jingdon ka jingiakynad hapdeng ki briew na ka shnong Umsarang kaba hap ha Hima Mylliem pyrshah ia ka shnong Pynthor Sohma ka shnong kaba hapoh ka jingpeit jingkhmih ka Hima Khyriem.

Haba pynshai sha ki lad Pathaikhubor, ki briew na ka shnong ka Umsarang, kata naduh ki nongialam shnong lem bad ki Longkmie, ki la ong ba katei ka jingkynnoh kaba la pynmih da kitei ki briew kiba kam ialade ba ki dei ki nongshong shnong ka Pynthor Sohma, ka dei ka bym don nongrim eiei ruh em bad ka dei tang ka jingkwah pynbudnam sniew da kitei ki briew ia ka shnong Umsarang.

Ki briew na shnong Umsarang, kiba kynthup ia u Bah Victor Jyrwa, u Bah Banker Nongkynrih, Secretary Shnong lem bad ka Kong Yanti Shampru, President Senglongkmie, ki la ong ba ka Pynthor Sohma, kam pat dei satia ka shnong kumba la kam da ki riew shim kabu, pynban ka Pynthor Sohma, ka dei tang ka Kyntoit ne ka Dong jong ka shnong Umsarang.

Ki la ong ruh ba ka daw baroh kaba la pynmih ia kitei ki huri hura bad kaba la ktah wat ia ka shongsuk shongsain hapoh katei ka shnong, ka dei ba la leh bastad da u Bah Phliak Kharbihkhiew lem bad ki katto katne ngut ki briew na Hima Khyriem, ha kaba ha u snem 2010, ki la pynioh Sanad Rangbah shnong ia u Bah Phliak Kharbihkhiew, kata kawei na Khyriem Tynring bad kawei pat na ka Khyriem Umket bad ia kitei ki Sanad u pyndonkam beit ia kitei ki artylli ki Sanad kum u Rangbah shnong ka Pynthor Sohma.

Kumta dei tang na kitei ki artylli ki Sanad Rangbah shnong hapoh ka Dong Pynthor Sohma, ki la long ka dawbah ban mih katei ka huri hura, tad haduh ba ki nongialam shnong ka Umsarang, kim lah shuh ban leh eiei na ka jingdom ki paidbah.

Namarkata ban weng ia ki kam huri hura hapoh katei ka shnong, kan wan tad haduh ba ki bor bahalor kin weng noh ia kitei ki artylli ki Sanad kaba la ai sha u rangbah shnong katei ka Dong Pynthor Sohma, namar kum ka shnong kaba don la u pud u sam uba biang, kam kwah ban don artylli ki Sanad Rangbah shnong tang hapoh kawei ka Dong, ki la bynrap.