Khie ka thma poh iing ha Ukraine, iap 14 ki shipai

14ngut ki shipai jong ka Ukraine, ki la shah pyniap bad sa kiba bun phew ngut, ki la mynsaw, haba ki riew ialeh pyrshah, ki la hiar thma bad ialeh pyrshah ia ki shipai ha ki bynta jong ka thain mihngi jong ka Ukraine mynta ka sngi. Katei ka dei ka jingialeh thma, kaba jubor bha, kaba la jia ha Ukraine, ha kaba lai tylli ki kali shipai, ki la jot thiaw bad sa kiba bun kiwei pat, kiba la ingkhong.
Ki ehrang, kiba ialeh pyrshah, kiba don ha ka nongbah Horlivka, ki kam ia ka jingkitkhlieh halor katei ka kam pyntriem, kaba la jia hajan ka shnong Blahodatne, kaba don hajan ka nongbah Volnovakha, Donetsk.
Kitei ki ehrang, ki sei ruh ia ki tiar ialeh, ba ki kam, ba ki la ioh kurup na ki shipai bad katei kaba pyni, ba ka dei ka jingialeh kaba triem tam haduh mynta ha katei ka thain.
Uwei na ki nongialam shipai jong ka Ukraine, haba kynthoh halor katei ka jingjia, ula ong “Ka thma ka dang shu sdang”.
Ka jingpynjot thiaw, ia kitei ki kali, ka long kaba jubor haduh katta katta, ha kaba ka pyni, ba kitei ki ehrang, ki iohlad ban rung sha ki jaka buh tiar thma jong ki shipai bad katei ka pyni shai, ba ki dei kiba la pynkieng atiar da ki bor shipai jong ka Moscow.
“Ngi la pynjot thiaw ia ka jaka talasi kali jong ki shipai Ukraine, ha ki bynta jong ka Donetsk Republic,’ ong u nongialam jong ka kynhun ehrang, uba la pyni dur ialade, ba u dei uba na Russia. “Kine ki dei ki tiar, kiba la ioh kurup, na kiba iap bad ki dei ki khusnam jongngi” ula ong.
Na ka liang jong ka Associated Press, ka kam, ba ka iohi 11tylli ki met iap, hajan jong katei ka jaka khynra kali jong ki shipai jong ka Ukraine, kaba don hajan jong ka shnong Blahodatne, hajan jong ka nongbah Volnovakha, Donetsk.
Ki don palat ia 30ngut ki shipai, kiba don bad ka sorkar Ukraine, kiba la mynsaw bad don na kitei kiba la mynsaw jur bha, ong ka khubor. Ki bor shipai jong ka Ukraine, ki iathuh ba kiba iap, ki don 14ngut.

Ki heh shipai jong ka Ukraine, ki la leit bak bak sha katei ka jaka, na ka bynta ban peit hi dalade ia ka jingjulor, ha kaba ki leit peit da ka helicopter bad wat la ki mynjur, ia katei ka jingjia, hynrei, kim shym la iathuh ia ka jingjulor, la ka jia haduh katno ia ki bor shipai.
Kane ka jingjia mynta, ka dei namar ba ka sorkar Ukraine, ka ialeh pyrshah ban pyndem ia ki riew ehrang, kiba la kurup ia ki iing sorkar, ia ki jingtei bapher jong ka sorkar bad kiba la pynbna ruh ialade, ba ki don ha ka ri laitluid.