Khie ka eriong ba jur haduh shi kynta, ha ka miet Sngi Saitjain

Shillong, 1 Jymmang:
Ka jingkhie eriong, ka long kaba jur shi katdei hynnin ka miet, ha ki bynta bapher jong ka Ri Khasi. Ha ki bynta jong ka Upper Shillong bad kumjuh ruh ha ki bynta jong ka thain Mawngap, Mylliem bad sha thain Riwar ruh kumjuh, ka eriong, ka la trei bor bah, naduh ka por 10baje mynmiet, kaba bteng haduh ka por 11baje mynmiet.
Wat la ka eriong, ka la neh kham slem, hynrei, kam shym la don shibun ka jingjulor, wat la ka khubor, ka iathuh ba ki don bun tylli ki iing, kiba shah lied ha shnong Umniuh Tmar, kaba don kumba 24 Kilometre shathie na Pynursla, ha katei ka bor jong ka eriong.
Dang ha ki khyndiat sngi ba la dep da ki spah tylli ki ing ki la julor ha ka jinghap phria ha ka shnong Nongsning,War Jaintia bad ki tnum ing jong ki ki la pei thliew lut hynrei haduh mynta la ong ba kitei kilonging kim pat ioh bor ban syrdep pat ia ki tnum ing jong ki naba la ong ba kiba bun ha kitei ki shnong ki dei ki briew kiba duk.
Kiwei pat ki lad khubor ki iathuh ba ki don ki ing kiba la shah ktah ha ka jingkhie eriong mynhynnin ka miet ha thaiñ War-Jaintia.Nangta la ioh khubor shuh shuh ba ha ki thaiñ Pynursla ruh ki la don ki ing kiba la shah rat ka tnum ha katei ka jingkhie eriong.
Ym tang katta, la iathuh ba ha ka shnong Nongsning,War Jaintia kito ki tnum ing,kiba la pei thliew lypa, ki la shah bom ha u slap uba jur hynnin ka miet bad u slap ula pyndap um ia ki iing ki sem, namar ba ki trai iing, kim pat ioh bor ban syrdep ia ki tnum ing jong ki, naba kitei ki shnong ki dei ki briew kiba duk. Lah ban pynkynmaw, ba ki don da ki spah tylli ki iing, kiba la shah pynjot ha u phria, tang ha ka shnong Nongsning bad ka daw, ka long namar ka jinghap phria kaba jur ha ka miet jong ka Sngi Palei.