Shillng: Hadien ka jing jar jar na ka jingwan jong ka khlam Covid-19 ha ka jylla mynta ka sngi ki 7 tylli ki sengbhalang kiba kynthup ia ka KSU, FKJGP, HNYF, RBYF, ADE, AYWO bad GSU ki la pynlong ia ka jingiakhih da kaba shong kyllain myngngor ha Madan Malki Shillong ban dawa na ka sorkar pdeng ba dei ban pyntrei kam ia ka ILP ha kane ka jylla kumba la pdiang ia ka rai da ka iing dorbar ka jylla Meghalaya.
Kane ka jingiakhih da ka ba shong kyllain myngngor, ka long ban pynpaw ia jing pyrshah halor ka jingbym lah jong ka sorkar ban pyntrei kam ia ka atiar ban iada ia ka Ri bad ka jaitbynriew kum ka Inner Line Permit, Citizenship Amendment Act, ka jingpynslem ban pyntreikam ia ka khyrdop iarung ia mih bad ka jingbym pat lah ban pynrung ia ka ktien Khasi bad Garo ha ka Eight schedule.
Kane ka jingiakhih da kaba shong kyllain myngngor ka ba la ialam da ka KSU, FKJGP, HNYF, RBYF, GSU, AYWO bad ka ADE la pynlong ha Khliehriat, Nongpoh, Mawkyrwat, Nongstoin ha Ishamati bad ha Shillong. Haba iadei bad ka jingshong kyllain myngngor ha nongbah Shillong, la pynlong ha Madan Malki.
U president jong ka KSU u samla Lambokstarwell Marngar haba kren bad ki lad pathai khubor, u la ong ba kum ki paidbah ka jylla kila dawa ia ka ILP naduh u snem 1979 bad ha u snem 2019 bnai Nohprah ka sorkar ka la shim ia ka rai hapoh ka iing dorbar ban pyntrei kam ia ka ILP ha kane ka jylla bad ia kane ka rai jong ka sorkar jylla la phah sha ka sorkar pdeng hynrei mynta la jan dap shisnem ka sorkar pdeng kam shym la leh ei ei halor kane.
U nongialam ka seng KSU, u la kynnoh ruh ba kane ka jingsngap mynthi jong ka sorkar India ka dei ka jingniew bein jong ka sorkar pdeng ia ka rai jong ka iing dorbar ka jylla kaba la shim ia kane ka rai. U general secretary jong ka seng HNYF u bah Sadon Blah u la ong ba ha ka synshar paidbah ia ka sur jong u paidbah la pynpaw ha iing dorbar da ki 60 ngut ki MLA ban shim ia ka rai ban pyntrei kam ia ka ILP ha kane ka jylla, lada ka sorkar pdeng kam sngap ia ka sur u paidbah ka la bha ba kine ki 60 ngut ki la dei ban hiar shuki noh.
Phi don ban ong eiei?