Khie ‘erlangthari bad phria ha ri-Bhoi

Shillong, 8 Iaiong:
Ka ‘er langthari ka ba jur ha ryngkat ka jing hap phria ka la khie ha ki thain Ri-Bhoi, bad katei ka jingjia ka la jia mynta ka sngi ha kaba 5 tylli ki shnong kiba hap hapoh ka Umsning C&RD Block ki la shah ktah jur. La ong ba ka jinghap phria bad ka ‘erlangthari ka la wan ha ka por 2 baje janmiet bad bun tylli ki ing bad ki jing thung jingtep ki la julor ha katei ka jingjia.
San tylli ki shnong kiba la shah ktah jur ha katei ka jingjia ki long ka Umdiker, Mawser, Wah langkhar, Umshorshor bad ka Lum Mynri, ki shnong kiba jngai tang kumba 9 kilomitar na Umsning. Haba bad ki lad khubor u Donbor Nongrang, uwei na ki nongshong shnong ka shnong Umdiker u la iathuh ba katei ka jingjia ka la sdang naduh ka por 2 baje janmiet bad ha katei ka jingjia shibun ki ing ki la julor bad kumjuh ruh ki jingthung jingtep, iathuh u bah Nongrang. U la ong ruh ba u phria uba ka jingheh kat ka bol kriket uba la neh haduh shi kynta shiteng u la pynjulor ia ka ing jong u kaba sop da ka tin.