Imphal: Ka sorkar Manipur, ka la khang ia ki jingialang paidbah bad ka la pyn sangeh ruh ia ka internet, ha Churachandpur district, hadien ka jingshah thang ka jaka pynkhreh jingialang, kaba dei ia U N Biren Singh, myntri rangbah ka Manipur, ba un leit ban plie mynta ka sngi.
Ka jingkhie bitar jong ki paidbah, ka dei hadien ba ka sorkar jylla, ka thmu ban jurip bad kurup noh ia ki khlaw kyntang kiba don ha katei ka thain bad kiba dei ruh ki jaka rep jong ki briew jong katei ka thain.
Ki bor pyniaid District, ki la pynjari da ka secton 144 jong ka Code of Criminal Procedure (CrPC), ban khanglad na ki jing ia kynad kiba lah ban nang jia shuh, hadien katei ka jingjia, kaba mynhynnin ka miet.
La iathuh, ba katei ka jingleit thang ia katei ka jaka jingialang, ka dei, kaba la pynlong da ka Indigenous Tribal Leaders’ Forum. Ka forum, ka kynnoh ruh ba ka sorkar jylla, ka la pynjot noh ia ki iingmane kiba don ha katei ka jaka bad kam niewkor ruh ia ki khlaw kiba la khein, ba ki dei ki lawkyntang ha katei ka thain.
U Biren Singh, u dei ban plie ia ka jaka ialeh kilan met (gym) bad sa kiwei de ki jing ialehkai ha katei ka iing, kaba la tei da ka sorkar, mynta ka sngi thohdieng.
Ym dei ban Shah Jem ia Kum kine ki nongthang iing Mane, bad dei ban ai jingsneng lang khnang ba kin nym nud ban leh trai khlieh iangi ki traibal/ritpaid