Ki nongshong shnong ka dew lynnong Lakshadweep lem bad ki seng sain pyrthei bapher, ki la iaid da ka mat ban dawa, halor ka jingiada ia katei ka dewlynnong kaba rit, kaba don shathie jong ka India bad la dawa ruh ban weng noh ia u nong synshar ka dewlynnong, U Praful Khoda Patel.

Ka jing pyrshah jong ki nong Lakshadweep, ka dei halor ki rai kiba la shim da U Patel, kiba la shim, ba kin pynduh jait ia ka jinglong jingman jong ki briew ha katei ka dew lynnong, kaba don haduh 97 percent ki nongshong shnong, kiba dei ki Muslim suda.

U Praful Khoda Patel, u dei u administrator jong ka jylla rit Dadra and Nagar Haveli, ka Daman and Diu bad kumjuh ka Lakshadweep, ha kaba u shimti naduh U Nohprah 2020. U Praful, u dei u heh BJP, uba na Gujarat bad ula long teng u myntri khynnah, ha ka sorkar jong U Narendra Modi ha katei ka jylla.

Ki ain kiba la thaw thymmai da U Patel, ki kynthup, ha kaba la khang syndon ban shoh doh ha katei ka dewlynnong, kaba don kumba 64hajar ngut ki nongshong shnong bad la khang ban pyniap ia ka masi kynthei, u masi shynrang bad baroh jait ki masi. La bthah ruh, ba ia ki mrad, dei ban pyniap, tang ha ka jaka kaba la buh kyrpang. La khang ban die doh ruh ha katei ka dew lynnong. Kiba pyniap bad kiba die doh, kin shong phatok shisnem bad kin shah dain kuna T.10 hajar. Naduh u bnai rymphang mynta u snem, la khang ia ki khynnah skul, ba kin song ja, da ka jyntah doh blang bad doh syiar ruh, kaba la ju pynbiang baroh shi katta ia ki khynnah skul, da ki Anganwadi.

La khang pyrshah ruh ia kito kiba don khun palat 2ngut, ba kin ialeh ia ki elekshon panchayat ha katei ka dewlynnong, nangta la shah ruh ban die kyiad ha ki jaka shang pyrthei, wat la ki Muslim, kiba don ha katei ka jaka, ki dei ki bym juh dih kyiad satia.

Nangta ki jaka ri jingri, la khang lut ha katei ka jaka bad kito kiba dang don jingri, la hukum, ba ki dei ban die lilam noh ha shwa ka 31tarik Jymmang 2021.

Ki nongialam ka Lakshdweep, ki la ujor sha U Secretary General, ka United Nations Secretary bad kumjuh sha ka United Nation’s Permanent Forum for Indigenous Issues, halor katei ka rai jong u administrator.