Khie bitar ka Dorbar Shnong Umkiang, ba hukum ki bar jylla bad ka tim sih tim sang ban bom naphang ia ki paidbah

Shillong: Ka Dorbar Shnong Umkiang, ka pynrem jur ia ki bar jylla kiba dei ki nongtrei jong ka MCL (Top Cem ) kiba long ka daw ka jingshah shoh bad shah bom naphang ki paitbah naduh ki khynnah rit bad ki kynthei khynnah ha ka sngi pynsngew paitbah ( public hearing) ba la pynlong da ka MPCB, Government of Meghalaya, ha Thangskai, East Jaintia Hills Disrtrict, ha ka tarik 24tarik Nailar 2023 na ka bynta ban pynheh (expand) ia ka jingpynmih ia u clinker bad cement jong katei ka Company. Katkum ki dur video, ba iohi lyngba ki Press Media/social media/ Youtube , la iohi ba la sympat, kura bad kynjat naphang ia ki paitbah khlem jingmap la kum ki mrad. Kane ka jingleh jong kitei ki bar jylla ban hukum ia ki pulit ban bom naphang ia ki paitbah ryngkat ka ktien sih ktien sang wat hapdeng ka jingdon ki kynthei bad longkmie, ka bym lah ban pdiang hapoh ka imlang sahlang jong ka bri u hynniewtrep.

Kumta ka Dorbar Shnong Umkiang, ka dawa jur ia ki bor badei khmih jong katei ka Company ban beh kam syndon ia kitei ki bar Jylla, kiba long ki nongtrei jong ka bad la kyntu ruh ia ki pulit ban kem bad pynshitom ia kitei ki bar Jylla, katkum ka ain khnang ba kiwei pat ki nongtrei bar jylla kin nym don shuh kiba shim ia ka bor hukum, halade ban phah shoh phah dat ne ban phah pyniap ia ki paitbah.



“Ha ka jingshisha ki nongtrei bar jylla ki dei tang ki nongbylla ne ki nongkhaii, bad kim don hok ban leh trai khlieh, leh heh, kren heh bad kren sih kren sang hapoh ka ri Khasi Khasi Jaintia jongngi bad kum ki nongshong Shnong ka thain Elaka Narpuh, ngim lah ban pdiang ia katei ka jingleh donbor jong kitei ki bar jylla” ong ka kyrwoh.

Kyntang iawai ka Dorbar Shnong Umkiang, kan pynkhih paitbah ban leh da kaba tyngeh ia ki bar Jylla lada kan dang iai jia, kumtei ia ki trai ri trai muluk nangne shakhmat katkum ka ain bad ka Dorbar Shnong Umkiang, ka kitbok kitrwiang ia kito ki para doh pra snam kiba shah pynmynsaw ha katei ka sngi ba kin ioh ka met ka phad kaba koit bakhiah lyngba ka jingdon ryngkat u Blei Trai Kynrad najrong, ong ka kyrwoh na U Ma Lasting Pala, Waheh Shnong bad u Ma Nicholas Lyngdoh, Secretary Shnong.