KHIE BIANG KA THYMMEI HA LANGPIH

Mynta la khie biang u Tohjaw bad ka Thymmei border ha Umwali kaba don hajan ka Langpih. Wei ba la khie une u tohjaw lane ka thymmei ki paidbah jong ka Meghalaya ki dei ki langknia kiba shem jynjar bad suhsat. Ki pulit Assam kiba ap pahara ha katai ka Langpih Police Out Post ki la shah training bha ba tang shu pher wiak dei ban patan bad khyrwit naphang ia ki Khasi jong ka Meghalaya kiba shong ba sah ha Langpih bad ki marjan. Ki Pulit jong ka Assam kiba la buh hangtai ki la ioh ka jingbthah bad ka training kaba paka ban wad dong wad daw beit ia ki paidbah Khasi kiba don hangtai bad dei ban ai jingiada bad kyrshan dohim dohiap beit ia ki Nepali kiba dei ki agnt jong ka sorkar Assam bad ia kiba ka sorkar Assam ka la buh khnang ia ki hangtai ha border bad ha kiwei kiwei ki border bad ka Meghalaya. Ka sorkar Assam ka la dep bthah shai ia ki Nepali kib shong ha Border ba ki dei ban iada bad ap pahara lem lada don mano mano ba lulia ia ki jaka ba la kam da ka Assam. To tip shai ba ki Nepali ki dei ki briew kiba kohnguh bha iala ki kynrad bad ka nuksa ka dei ia ki shipai Gorkha, kumno kiba lah ban shaniah. Hangtai ha border ruh ia ki Nepali la ai jaka khnang da ka sorkar Assam ha ki khap-pud bad ka Meghalaya, bun na ki ki dei ki jaka jong ka Meghalaya, bad ia ki la bthah janai ba ki dei ban ap pahara bad ki dei ban report sha ki pulit Assam lada don mano mano ba nwan jan bad ka border Assam. Te kumta, ka don ka jingiatreilang kaba jan bha bad ka don ruh ka jingiasngewthuh jingmut hapdeng ki Nepali bad ki Pulit ka Assam. Ki Pulit Meghalaya kiba don ha Langpih pat kim don training ei ei ha kaba iadei bad kumno ban iada iala u jong u pud u sam bad kim salia lada ki briew jong ka Assam ki wan buhai shnong ha ki jaka Meghalaya ruh. Nalorkata, kam don ka jingiasngewthuh jingmut hapdeng ki pulit6 Meghalaya kiba don hangtai bad ki paidbah Khasi kiba don ha ka thain Langpih. Ngim tip ki leh aiu ki Pulit Meghalaya haba ki Khasi ki la shah bom shah shoh bad shah patom ha ki Pulit Assam. Lehse, ki la kylla long pynban ki nongpeitkai ia ka drama shohbriew ki pulit Assam. Ki jingjia kiba kum kine kin nang iai jia lada ki briew jong ka Meghalaya ki ai jem ia ki pulit bad ki briew jong ka Assam bad kin jia shi jia lada ka sorkar Meghalaya kam iapynbeit noh wud wud ia u pud u sam bad ka sorkar Assam. Naduh ka snem 2010 haduh ka snem 2018 ka sorkar Meghalaya, ka khein sting bha ha kane ka bynta. Ha ka jingshisha, ka la iakynduh tang arsien ban iakren. Ka sorkar MDA lei lei kam pat leh ei ei halor kane ka bynta. U Konrad kum u Chief Minister, um kitkhia ei ei halor kane ka phang. Ha ka jingshisha, u la dei ma u kein u ban tynruh shi tynruh ia kane ka bynta ban iabeit noh bad ka Assam. La kyntu ruh ia ki pulit Meghalaya ban shim khia ban iaida ia u pud u sam lajong bad ban iada iala ki jong ki briew lada ki8 shah lehbein.

Khublei.

Bah Philip Marwein,

da ka email.