Nongpoh: Hato ki paibah ka Meghalaya kin suk ba ka Khanapara kan shah klun noh ha ka Assam? U dei u dak jingkylli uba heh bha ym tang ia ka sorkar jylla, hynrei ia ki paidbah nongshong shnong ha ka jylla hi baroh kawei. Katei ka jingkylli ka la wan hadien ba la iohi ia ka jingkyntur pud ba man ka por da ka Assam, ha katei ka shnong bad mynta lei lei la ioh jingtip na ki nongialam jong katei ka shnong, ba ka Assam ka la mut ban buh syndon da ka Metro Main Station ha ka jaka kaba don ha syndah bad katei ka shnong.
Ka jaka kaba ki nongialam ka FKJGP ki leit ban buh Signboard, hynrei mynta la don da ka iing Trafic Police ka Assam
Ka sakhi kaba shai eh halor ka jingwankyntur pud ka Assam ha katei ka shnong, ka dei ia kawei ka jaka kaba don don ha katei ka shnong, ha kaba kata ka jaka ka dei kaba dang hap hapoh Meghalaya bad ka dei ruh ka jaka kaba ki nongialam ka seng FKJGP ha u snem 2015, ki la leit ban buh mawpud, hynrei la wan ban pynsangeh noh da ka Assam.
Halor katei ka jingiai wan kyntur pud ka Assam, u Rupang, u la ioh ban iakren ia u Bah Jeremy Lyngdoh, Rangbah shnong bad u Bah Koste Lyngdoh, Secretary shnong ka Khanapara, ki la iathuh ba ka daw kaba la pynlong ia ka Assam ba kan shlur ha ki kam kyntur pud, ka dei namar ka jingbym shimkhia ka Meghalaya bad kawei pat ka daw ka dei namar ka jingbym shimkhia da kito ki briew kiba don jaka ha katei ka shnong.
Ki la iathuh ruh, ba bun na ki jaka kiba la shah klun ei ha ka Assam, kim dei ki jaka jong ki briew kiba shong ba sah ha katei ka shnong, hynrei ki shu don tang ka jaka bad ialade pat ki sah shawei, ha kajuh ruh ka por kim ju wan peit wan khmieh ia la ka jaka bad kaba sngewphylla ka long ba kitei ki briew kiba don jaka ha katei ka shnong kim ju wan mih, wat lada ka shnong ka khot ia ki na ka bynta ban pyni ia ki kot ki sla, khang ba kin long kum ki sakhi lada ka Assam ka wan kyntur pud.
Shuh shuh, ki la ong ruh ba bun na kiba kum kitei ki jaka kiba la longtrai da ki briew ki bym sah ha katei ka shnong, la aiwai bad phah sah da ki Bar jylla bad kane ruh ka dei kawei na ki dawbah kaba la pynlong ia ka Assam ba kan shlur ba kyntur pud ha kiba kum kitei ki jaka.
Kumba ka long mynta lei, ka Assam ka la wanbuh da kawei ka Khanapara Traffic Branch, mynta ki mut ban buh sa ka jaka treikam jong ka Assam State Transport Cooperation (ASTC) bad kaba kham ma eh ka long ba la ioh jingtip ba ka mut ban buh syndon da ka Metro Main Station ha Khanapara, ha kaba ngim tip ba kane kan donkam haduh katno ka jingheh jong ka jaka.
Haba kylli halor ka jingshimkhia na Meghalaya, kitei ki arngut, ki la ong ba ki la ngiah ban ujor, namar kat kaba ki ujor ym ju seisoh ei ei, namar ym don kiba shimkhia bad kiba nud ban iatai bad ka Assam, dei na kata ka daw ba mynta ki la shu shong kumne kum kiba matlah bad ki shu peitkai ia ki kam kaba la leh da ka Assam.
Haba iadei bad ka jingdon ki iing ha katei ka shnong, ki la iathuh ba kumba ka long mynta ha katei ka shnong ki don kumba 371 tylli ki tnum iing bad na kitei ki 371 dei tang 26 tylli kit num iing kiba la sah da ki Khasi.
Ha kaba pynkut, kitei ki nongialam shnong ki la ong, ba donbok namar ka jingdon ki dukan Thohtim bad ki Wine Store, namar kumba ka long mynta hi, ia u pud u sam ka jylla la ithuh bad iada da ki dukan Thohtim bad ki Wine Store, ki la bynrap.