Khasi – Israel: Khanapateng Eksodos

Da U Collin Wanñiang

Kylli ïa u Paid Khasi HynñiewTrep ne ïa kano kano ka Jaitbynriew shaphang nangno ki wan bad kumno ba ki kylla shongneh ha kata ka Jaka; ynda la lut baroh ki Jingpynshongnongrim ha ka Jingstad jong ka Juk bamynta, ka jubab kan long “Ka la shu jia kumne.” Ha kito kiba ngeit Blei, “U Blei u la mang ïangi ban shong ban sah hangne”. Ha ka Pyrkhat Khasi: “Ha Mynnyngkong la don baroh Khadhynriew Trep. Hynñiew na ki, la phah hiar lyngba ka Jingkieng ksiar Sohpetbneng ban rep ban riang. Phewse, ki la hap sah noh junom ha Sla Pyrthei hadien ba la dkut noh u Sohpetbneng na ka daw ba ki HynñiewTrep ki la pynkhyllem noh ïa ka Diengïei.”
Man la ka Jaitbynriew ka don la ka Khanapateng ban ai sha ki Longdien. Ki Khrawpyrkhat jong ka Juk mynta ki ong ba ki Khasi ki don Jingïadei bad kita ki Monkhmer bad ba ki la wan shongneh ha kine ki Lum na ka Thaiñ Shathie lam Mihngi jong ka Dewbah Asia – na ki Thaiñ jong ka Wah Mekong kaba tuid lyngba ïa ki Ri Thailand, Vietnam, Laos, Cambodia. Ha ka jingshisha, ha ka Amwi-Khasi, ka Ktien kaba ki Nongthoh kum u H.Bareh u kheiñ ba ka dei ka Ktien kaba dang pynsah ïa ka snap Monkhmer, ka jingmut “Mekong” ka ïaryngkat bad “Meisan” ha ka Khasi. U David Roy u la thoh ba ka Thoh ka Tar Khasi ka la wan lyngba ka ktien War Amwi. Kumta ruh u H.Bareh u la kubur ba ka ktien Amwi ka kham jan sha ka Monkhmer ban ïa ka ‘standardized Khasi’ bad ba ka dei ka Jingpynïasnoh hapdeng ka Khasi bad Monkhmer. Ïa kane la kubur ruh da u L.S.Gassah uba ong ba ki Khasi kiba nyngkong eh ki la buhai-shnong ha ki bynta ba shaphang Mihngi jong ka Jaintia Hills. Kane ka mut ba ki Khasi ki la wan kiew nyngkong eh na Ri Thor lyngba ka Jaintia Hills.
Kumne ngi lah ban mutdur ba ki Khasi ki la ïaidwir shwa ba kin wan shongneh ha kine ki Lum jong ka Bri HynñiewTrep. Ngin shim ïa kane kaba la ïathuh ha ka Khanapateng u Khasi kum ka Jingïanujor bad ka Jingïaidwir jong ki Khun Israel kumba ka paw ha ka Baibyl. Ban sngewthuh kham shai, donkam ïa ka Jingtip shaphang ka Tynrai Ktien jong ka Sngikhraw Sahkynmaw laitluid na ka Jingtehmraw u Pharo ka Ri Ijipt kaba la khot “Pesakh” ha ka Hebru, “Paskha” ha ka Khasi kaba la pynwan na ka Tynrai Ktien Hebru “Pesakh” lyngba ka Grik “Paskha”. Lada pyndonkam hangne da ka Phareng “Easter” ka ikumba kam da kit Jingmut eh namar kumba ka paw ba kane ka Kyntien ka lah ban thew sha ka blei Anglo-Saxon, “Eostre”, kaba kdew sha ka blei jong ka step phyrngap.
Ka Baibyl ka ong ba ki Khun Israel ki la hap ban mih noh namar ka Jingpynshitom ha Ri Ijipt. Khlem pep ka la don kaei re kaei kaba la pynlong ïa ki Khun Khasi ruh ban mih noh bad leit wad Jaka ba kham bha.
Ki Khun Israel ki la don ka Thong ban poi sha ka Ri batuid da ka Dud bad ka Ngap – ka Ri ba la kular. Kumta ruh, khlem pep, ki Khun Khasi ki la don ïa ka Thong ban wad da ka Jaka baseisoh (batuid da ka Dud bad ka Ngap) – Ka Ri ki Laiphew Umtong, Ka Ri baieid ki blei.
Ki Khun Israel ki la hap ban kam lyngba ka Duriaw basaw. Kumta ruh ka Puriskam ka ong ba u Khasi u la kum nguid noh hapoh Kpoh ïa la ka Kot ha ka por ba u hap ban jngi, ban kam lyngba sha shiliang.
Ki Khun Israel ki la hap ban ïaidwir sawphew snem ha Ri shyiap – kaba mut ba da ki bun bun snem. Kumta ruh u Khasi u la ïaidwir da ki bun bun snem shwa ba un shongneh ha kine ki Lum.
Ki Khun Israel ki kheiñkor bha ïa ki Lum, kum ïa u Lum Sinai namar la ngeit ba ki dei ki Jaka shong Blei. Kumta ruh ki Khun Khasi, kum ïa u Lum Sohpetbneng, Lum Shillong bad kiwei.
La ong ba ïa ki Khun Israel la pynlong da ki Khadar Jaitbynriew. Kumta ruh ïa ki Khun Khasi la pynlong da ki Hynñiew Trep.
Ki ong ba ha ki Israel, ki nombar ba ki pyndonkam khah khah, ki dei kiba kit Jingmut: Kumne u Nombar 12 = 12 ngut ki Khun shynrang u Jakob na kiba la mih 12 Jaitbynriew Israel; Nangta 12 ngut ki Apostol ha ka Jutang Bathymmai. Ha ki Khasi ruh u nombar 12 u thew ïa ka Jingpura – 12 Dolloi. Nangta u Nombar 7 ha ki Israel u thew ïa ka Jingdap pura – Ha ka Sngi bahynñiew U Blei u la dep lut ïa ki Kam baroh, kumta U la shongthait (Jen.2:2). Ha ki Khasi ruh u nombar 7 u lah ban kdew sha kata ka Jingpura “HynñiewTrep”. U nombar 30 ha ka Baibyl u kdew sha ka Jinglongrangbah dapshynrang – u Joseph u la dap 30 snem ha ka por ba u la sdang rung ha ka Riti Synshar ka Ijipt (Jen.41:46); u David u la dap 30 snem ha ka por ba u la sdang synshar halor ki Israel (2Sam.5:4); u Jisu u la dap 30 snem ha ka por ba u la sdang hikai Paidbah (Lk.3:23). Ha ki Khasi ruh u nombar 30 u kit Jingmut – Ka Ri ki 30 Syiem, Laiphew Jait, Laiphew Rong, Laiphew Jingthaw…
Ki Jiw haduh mynta mynne ki pyndonburom ïa ka Sngikhraw “Pesakh” ban sngewnguh bad ban pynkynmaw ïa kata ka Jingpynlaitluid (Eksodos) na Ri Ijipt bad ïa ka Jingpynlong kawei ka Jaitbynriew Israel hapoh ka Jingïalam u Moses. Ha ka Nguh ka Dem Kñia U Khasi, ka don barabor ka Jingsngewnguh ïa U Blei Trai Kynrad na ka bynta ka Longrynïeng Manrynïeng, ba U la pynbit pynbiang ïa ka Longbriew Manbriew. Ha ki Khasi Khristan lei, lada ki pynshongnongrim shisha, kata ka Jingiaidwir Eksodos shaduh ka Ri talwiar u Sohpetbneng, la pynpura ha ka Jinglehkmen Paskha jong ka Aïom Pyrem manla u Snem – ym dei shuh tang ka Jingsahkynmaw ïa kata ka Jingïaidwir Eksodos ban poi sha ka Ri shongbasa ba la kular, hynrei ka Jingïaidlynti na ka Pyrthei shongbasa sha kata ka Ri shongneh ba la kular.
Hapdeng ki Jiw, ha ka Jinglehkmen Paskha manla u snem, i Khun barit tam jong ka Ïing in hap kylli ïa la u Kpa ha ka miet Paskha: “Balei kane ka Miet ka pher na kiwei pat ki Miet?” Nangta u Kpa ka Ïing u hap ïathuh ïa ka Khanapateng jong ka Jingïaidwir jong ki naduh Ijipt shaduh Kanaan (Ek.6:6-8). Ha kane ka Juk jong u Khasi mynta, hato don mo u Longkpa uba lah ban jubab ïa ki Jingkylli ki Khun ka Juk mynta? La leit noh kito ki Sngi ha kaba ki Pabah Meibah ki shait ïathuh Khana Puriskam Purinam ban pynïohthiah ïa ki Khunrit namar mynta ha ka kyrteng jong “Ka Jingbymdon Por” ïa ka Jingïadei hapdeng Para Briew la pynbujli noh da ki Kor ki Bor.
Wat la katta ruh, ngim lah kiar ïa ka Jingkylla jong ka Por; hynrei kaba donkam eh ka long ban tip ba ka shong eh ha ki Kmie ki Kpa kumno ban tei ïa la Longbriew Manbriew jong ki Khun wat ha kane ka Juk Jingkylla khamakha. Kaba donkam eh dei ka Jingïasyllok Shiïing Shisem hapdeng u Kpa, ka Kmie bad ki Khun. Khlem kane yn kham ñiar ban shem ïa kita ki Khun ki ban long ki Mawkordor jong ka Imlang Sahlang namar ka “Akor ka Burom ka sdang na la Ïing na la Rympei bad ka sa bteng ha Skul”. Yn ym don uba lah ban bujli ïa ka Kamram bakordor tam eh jong i Pa i Mei.