Khapngiah ki ophis, na ka baisha dewiong

Shillong, 28 Naiwieng:
Hadien ba la ioh ia ka hukum na ka NGT ba tang kito kiba la dep siew ia ka khajna bapher ba pher kiba lah ban shalan ia ki dewiong jong ki, ka Hynniewtrep Youth Council –Jaintia Hill district ka la lap ba hapdeng katei ka jingbunkam ki nongkhaii dewiong ban pynbiang ia ki kot ki sla don pat ki nongtrei sorkar ki nongtrei Bank kiba shim kabu ia ki, kaba ka HYC ka la ioh jingujor.
Halor katei ka jingjia ka HYC-JHD hapoh ka jingialam u President Bah IJ Dameki Paswet ki  leit sha ki tnad bapher bapher kum ka JHADC (Forest Dept), DMR, Sales tax office kumjuh ruh ia ka bank kaba ki briew ki dei ban thep pisa ban siew jingsiew. Ka HYC ka la lap ba ha ka jingshisha ia ka kam ban pyndep ia ki kot ki sla ban siew ban tda bad ban ioh ia ki challan kam da shim por than hynrei ka dei tang ka jingkwah baisha ki ophisar kaba pynslem bad kaba pynkhapngiah ia ki ophis sorkar.
Halor kane ka jing shim kabu palat, na ka liang ka seng ka maham jur ia kum kine ki briew bad lada lap ia ki nangne shakhmat ka seng kan aiti ia ki ha ka ain ban pynshitom ia ki kam bymman ka jong ki bad ka seng ka kyntu jur ruh ia ki trai dewiong ba lada ki don kita ka jingshim kabu palat jong ki nongtrei kam sorkar haki tnat bapher bapher ki dei ban pyntip sha ka seng halor kane khnang ba nangne shakhmat ban suk ki kam ki jam ka jong ki hadien habud. Ban kham pynsuk shuh shuh iaki paidbah ki lah ruh ban phone ha kine ki no 9863560668, 9856632549, 8794307214 ,khnang ban ka seng kan lah ban shakri khambha sha ka jaitbynriew ka jong ngi, katkum ka kyrwoh ba la pyllait paidbah da u Bah. Damanleki Lathong, Publicity Secretary HYC-JHD.