Shillong, 13 Naitung:
Ki paidbah ki la tuid sha ki ophis ki MLA bad MDC jong ki ha kine ki sngi ban leit pan serti phiket jaka shong jaka sah na ki namar ba u Rangbah Shnong um don bor shuh ban ai sertiphiket shnong ia ki naduh ba ki la shah sloit bor ha ka 10 tarik u Nohprah, 2014 ha ka High Court.
Kat kum ka jingioh lum jingtip u nongthoh khubor la ong ba da ki phew phew ngut ki paidbah kiba ym duna ia ka 50 ngut ha ka shisngi ki la tuid sha ki MDC bad MLA jong ki ban leit wad sertiphiket bad la ong ruh ba ha kine ki sngi ki MLA/MDC ki la bunkam palat ban ai sertiphiket shnong ia ki paidbah ban pynshisha ba ki dei na ka konstitwensi jong ki. Kiba bunbah ki MLA ki MDC ha kine ki sngi kiba la pynkhreh lypa ia ki sertiphiket kiba ki la dep thoh lypa ban ai sha ki paidbah ki ban wan sha ki ophis jong ki kaba ki la pyllait jaka lypa tang ban pyndap ia ki kyrteng bad ban soi bad shon muhor khnang ba kan ym tuh than ia ka por treikam jong ki, haba ki paidbah ki wan ban ia kynduh.
Naduh i jingdonkam iba rit haduh kaba heh ia ki sertiphiket shnong ia ki paidbah la hap ban pynbiang da ki nongmihkhmat jong ki bad kaba kham sngew thamula shuh shuh ka dei ba wat haba don kiba shah dait ksew ruh ki hap ban leit wad sertiphiket shnong na u MLA ne MDC, lym kumta kin ym ioh ban ai injek ialade. La ong ba ha ki jaka sumar sorkar haba don kiba leit ban shah injek naba shah dait ksew ki jaka sumar ki ju pan ia ka sertiphiket shnong bad kin ym injek lada ki paidbah kim lah ban pynbiang kumta ki hap ban mareh sha ki nongmihkhmat jong ki ban ioh sertiphiket.
Phi don ban ong eiei?