Khanglut ploiñ ki Wine Store rud surok, hajan skul & jan iing mane

Shillong,1 Iaiong:
Ka Meghalaya High Court ka la pyntrei kam ia ka aiñ ba la wanrah da ka sorkar kata ban pyn kylla dur noh ia ka Meghalaya Excise Rule kaba ka sorkar ka la pynmih hukum ha ka 23 tarik u nailur, 2015 kaba ia dei bad ka jingdonkam ban khang noh ia ki jaka die kyiad phareng lane ki wine Store kiba don hajan surok bah, hajan ki skul ne kolej lane hajan ki ing mane bad Hospital.
Ka High Court ka la pynmih ia katei ka hukum hadien ba la ujor da u bah Hamsaia Pariat sha kashari. Katkum katei ka aiñ jong ka sorkar la ong ba ym shah ia ki dukan kyiad kiba don hajan ki skul,ki kolej, ki ing mane,ki hospital na ka jingngai kaba 200 mitar bad yn ym shah ruh ia kitei ki dukan kyiad ba ki don 100 mitar ka jingjngai na ka surok bah.
Hadien ba ka High Court ka la pynmih ia katei ka aiñ u Rupang Ia iaid kylleng ka sor Shillong ban peit hato dang don ne-em ki Wine Store kiba pynkheiñ ia katei ka hukum ka High Court. La iaid kylleng ka Laitumkhrah harud surok bah la iohi ba baroh ki Wine Store ki la khanglut, ha Khyndailad ki wine store kiba don hajan surok ki la khanglut ha Polo la iohi ba la khanglut, ha Motphran kiba bun ki wine store ki la khanglut. Ha Iew mawlong la iohi ba ki dang don sa katto katne tylli ki wine store kiba dang plie bad kawei na kine ka dei kaba don ha syndah ka ing mane blei ki Hindu hajan Shiv Mandir bad hajan Gurudwara. Ha Keating Road ha ka por mynsngi ki dang plie hynrei kham hadien ki bor District ki la wan khang noh ia ki.
Ha Ri-Bhoi u SP katei ka District haba kren bad ki lad khubor u la iathuh ba baroh ki wine Store ki la khang bad baroh ka jingdon ki Wine Store ka long haduh 67 tylli bad baroh ki la khanglut kumjuh ar tylli ki Bar lane ki jaka dih kyiad kiba la ioh laisen.