Khang tala na bar trei shapoh;38% wan trei, 30% ha East Khasi

Shillong,19 Nailur:
Mynta ka sngi ka dei ka sngi ba ki sengbhalang ki la khot pakhang ophis ha baroh kawei ka jylla, kum ka dak ka jingpyrshah bad ka jingiakhih namar ka jingbym pyntreikam ka sorkar jylla ia ka ILP ha kane ka jylla. Ha baroh kawei ka nongbah Shillong ki la kynjah jar ki ophis sorkar ha kaba don ki ophis kiba ki nongtrei ki wan trei bad don pat kiba ki nongtrei kim wan trei.
U Nongthohkhubor haba iaid kylleng ka nongbah , u la lap ba wat la kham bun ki ophis kiba khang tala, hynrei ki don pat ki ophis kiba ki khang tala na shabar katba hapoh pat ki long trei ngai ngai kumba ju long man ka sngi. U nongthohkhubor u la lap ruh ba ki don ki ophis ba ki nongtrei ki shu wan tang ban soi kyrteng bad tang marsien dep soi kyrteng ki la mih noh bak na ophis jong ki.
Katkum ka jingioh lum jingtip na u Principal Secretary Home u KS Kropha la ioh jingtip ba ki nongtrei sorkar kiba la wan poi trei mynta ka sngi ha baroh kawei ka jylla ki kot sha ka 38% katba ha East Khasi Hils tang 30 % kiba wan trei bad ha West Khasi Hills pat tang 38 % ki ba wan trei.