|
Shillong: Ka Khasi Student Union Central Body mynta ka sngi ka la leit ban khangtala ia ka jaka trei kam u Director ka NEIGRHMS u D.M Thappa halor ki kynrum kynram bad ka jing ia kynad bad u Director ka ba la wanrah ia ka jingdkoh ia ka rukom trei kam ha baroh ki liang ha Hospital NEIGRHMS.
   Ha ba iakren bad u President Khasi Student Union Central Body u bah Lambok Marngar u la ong, “Ka jingia kynad bad jing bym beit ka rukom pyniaid kam jong une u director kadei shi bynta jong ka jingpyndkoh jong u ia ka jingiaid beit ki kam hapoh kane ka hospital kaba heh tam ha kane ka thain shatei lam mih ngi. Ha ka ba ki nongpang ki ba wan phah sumar ha NEIGRHMS ki kylla sohpdung kum ha ki khyndiat sngi la sakhi tang naka daw bym biang ki tiar bad jing long riewkhlaw jong une u director ka lawan rah ia ka jing duh noh jong iwei i longkmie ia la ka jing im ka ba kordor”.
Na ka liang ka seng ki pynremjur ia ka jingkhlad noh jong i longkmie bad ki dawa ruh ba u director ym dei shuh ban shong ban sah hynrei u dei ban mih noh na kane ka jaka sumar. U bah Lambok Marngar u President ka KSU u la ong, “Na ka liang ka seng ngi kwah ba uno uno u director u ba wan shimti ia ka kam un ai ia ka jing shakri ka ba paka bad janai khnang ba ki nongpang ki bawan phah sumar ha kane ka Hospital kin ioh ia ka jing sumar ka ba janai.Ngim kwah ba u director u ba wan shimti un long pynban u nongpyniap briew.”
Na ka liang jong ka seng kin ym lah ban shu shong kli kti ne sngap jar bad kin buddien haduh ba u director un mih syndon na Jylla Meghalaya khamtam na kane ka jylla jong ngi. “Ki kyrwoh ki ba na ka liang ka KSU ka long ba kiei ki jingjia ki ha kine ki khyndiat sngi khamtam ka jing duh noh ia ki mynsiem briew ki ba wan phah sumar hangne ha Hospital u ne u khlieh duh ka NEIGRHMS un shim ka jing kitkhlieh ba ym dei tang u nong pyniaid ia kane ka Hospital hynrei u dei u nongpyniap briew namar ladei kim dei ki daw tynrai bad ki jingthoh jong u kan ym wanrah ia ka jing jia sngewsih,” la ong u President ka KSU.
Ha ba kren bad ki lad pathai khubor, u samla Donald Thabah Genl Secy jong ka seng KSU seng kmie u la ong kadaw ba la shim ia kane ka sienjam mynta ka sngi ka long ba ka dei ka sien ka ba ar ba la iap briew tang na ki kynrum kynram ki ba la mih hapdeng ki nong pyniaid jong kane ka hospital bad ki doctor jong ka cardiology department.
“Ha ka por ba khlad I wei I briew na Khadar Shnong, na ka liang ka seng ngi la buh ia ka appointment bad u director bad u la pan ia ka daw bad ngi la batai, hynrei une u director um shym la patiaw satia bad ha ka sien kaba ar ruh ha ka jing leit buh appointment biang da u Environmental secy bad u Asst Genl Secy jong ka KSU bad la ai ruh ia ka daw kaba dei halor ka jing iap jong iwei i briew ka ba long na ki kynrum kynram hangne, hynrei u khlem ai ia ka appointment, kumta na mar ngi la sngew thuh ba un ym ai appointment ia ngi lano lano ruh bad ka pyni shai ba ym khein snep ia ka seng, kumta ngi la shim ia ka ne ka sienjam bad ngi la khang tala syndon iaka ophis jong u bad u ruh un ym lah ban trei kam hangne,” la ong u samla Donald Thabah bad ha ka juh ka por u la bynrap ba la da un dang wan biang hangne na ka liang jong ka seng ngin pynlong biang da ka jing iakhih.
La sngewthuh ba hadien ka jingkhlad jong ka longkmie na Mawphlang, kumta kiba iap mynta na katei ka jingleh bym kit khlieh jong katei ka Hospital, ka la poi sha ka arngut.
|
Phi don ban ong eiei?