Nongstoiñ, 8 Risaw: Ka Seng Khasi Student Union Mawshynrut Circle ka la pynpaw ia ka jingsngewkhia kaba jur halor ka jingshah khang tala noh ka Sub Centre kaba don hapoh ka shnong Tynhiang,West Khasi Hills kaba dei ruh kawei na ki jaka ai jingsumar kaba shakri ia kiba bun tylli ki shnong ha katei ka thaiñ.
Katkum ka kyrwoh khubor ba la phah da u President ka Seng KSU Mawshynrut Circle u Samla Armstrong Sohshang, u la iathuh ba ia katei ka Sub Centre la khang tala noh naduh ka 11 tarik u Nailur mynta u snem da ki trai khyndew kiba la ai sngewbha ia ka jaka ban tei ia katei ka Sub Centre.
Shuh shuh ka kyrwoh khubor na u tei u nongialam ka ong ruh ba ka daw halor ka jingshah khang tala noh jong katei ka Sub Centre, ka dei tang namar ka jingshah weng kam jubor jong u wei u samla u ba dei ruh u trai khyndew u ba la trei ha ka tei ka Sub Centre kum u chokidar ha ka jaka jong u kñi jong u uba la khlad noh.
La ong ruh ba u tei u trai khyndew u ba la trei ruh kum u Chowkidar ha katei ka Sub Centre ha ka jaka jong u kñi u la ioh ruh ia ka shithi thungkam kaba shipor kata naduh ka 25 tarik Nailar haduh ka 22 tarik u Risaw, hynrei ha shwa ba ka por jong u kan kut noh ki bor ba halor ki la phone ia u ban pynsangeh noh ia u bad tang hadien katto katne ba u la shah bthah ban sangeh noh u la ioh pdiang pat sa ka shithi ba u la shah weng kam noh na katei ka tnad ha kaba la thung bujli ruh da uwei ha ka jaka jong u.
Ka kyrwoh khubor ka iathuh ruh ba na ka liang jong ki trai khyndew kiba la ai sngewbha ia katei ka jaka na ka bynta ban tei ia katei ka Sub Centre bad ki la iasoi ruh ia ka jigmynjur bad ka sorkar lyngba ka tnad jong ka koit ka khiah ha u snem 1992 bad la ia soi ruh ba kino kino ki kam kiba lait kum ka kam chowkidar dei ban ai bad thung beit da ki trai ba ai jaka khlem da pynrung sha ka District Selection Committee (DSC) bad la ong ruh ba dei halor ka jingpynkheiñ ia katei ka jing mynjur, kaba la pynlong ia ki trai khyndew ban khang tala noh ia katei ka Sub Centre.
Na ka liang jong u Samla Armstrong Sohshang President KSU Mawshynrut Circle haba iadei bad katei ka bynta u la ong ba ka jingshah khang tala noh jong katei ka jaka ai jingsumar ka la pynshitom bad pynkhuslai jingmut ia kiba bun ki paitbah jong ki hynniew tylli ki shnong ba kynthup ia ka shnong Proin, Rimardon, Tynhiang, Porla bad kiwei kiwei ki snhong ba marjan khamtam eh ka jingktah ka long ia ki longkmie kiba dei ban leit ai injekshon ia ki khyllung jong ki bad kumjuh ruh ki longkmie ba armet.
Phi don ban ong eiei?