Khang lynti ki nongtrei GHADC ia U CEM bad ki EM

Shillong, 5 Nailur:
Ki nongtrei jong ka Garo Hills Autonomous District Council (GHA DC), ki la sdang ia ka jingiakhih jong ki mynta ka sngi kaba la tip kum ka non-Co-operation Movement ban dawa na ka District Council ba ka dei ban siew noh ia ka tulop jong ki kaba la kot mynta 10 bnai.
Ha katei ka jingia-khih ki la don da ki hajar ngut ki nongtrei ka GHADC, kiba la rah bad khun bad kti bad ki la khang lynti ia U CEM u Denand T Sangma bad kumjuh ia u Dy.CEM bad baroh ki EM. Kitei kim shah ia ki EM ne u CEM ban rung hapoh ophis treikam jong ki bad ki la dawa ba ki dei ban siew shuwa ia ka tulop jong ki kaba sahteng haduh mynta.
Kitei ki nongtrei ka GHADC ki la byrngem ban bteng ia ka jingiakhih kaba khlem buh por jong ki tad haduh ba ka GHADC, kan da siew lut ia ka tulop jong ki, hynrei u CEM pat u la ong ba un ia kren bad ki ba kin weng noh ia katei ka jingiakhih da kaba pyrshang ban shimkhia kumno ban thawlad ban ioh siew tulop ia ki.
Kitei ki nongtrei ki bitar ruh ia ka GHADC kaba ki la kynnoh ba ka la siew lut ia ka bill jong ki kontraktor katba ia ka tulop jong ki pat kam don pisa hynrei halor kane u CEM u la ong ba katei ka dei tang ka jingkynnoh katba ha ka jingshisha pat u la ong ba ka Council ka siew pisa tang sha ki kam kiba donkam kyrkieh eh.
Ki nongtrei katei ka Council ki la ong ba ka jingbym ioh tulop kab a10 bnai ka la ktah ia ka ing ka sem jong ki, ki khun ki kti jong ki.