“Khang lynti ki Jugali sha ophis ka MeECEL” lashai ioh shithi thungkam

Shillong, 16 ’lyngkot:
Ki nongtrei Jugali mynta ka sngi ki la khang lynti sha ophis ka kompeni sam ding ka jylla ka Meghalaya Energy Corporation Limited (MeECL) da kaba shong kyrain ha surok ha khmat khyrdop ka MeECL ha Lumjingshai, kum ka dak ban pyrshah ia ka jingbym ioh shithi thungkam haba ka por jongki, kan sa kut noh shen ha u Nailar ban wan mynta u snem.
Da ki spah ngut ki Jugali kiba la kam ba la pass ki la khang lynti ha khyrdop ka kompeni MeECL da kaba dawa ba ka dei ban ai noh ia ka shithi thungkam ne ka Letter Of Appointment (LOP).
“Ngi dawa ia ka hok”, la pyrta kine ki Jugali ka MeECL.
Ia kine ki Jugali la kyrshan da ka Khun Hynniewtrep National Awakening Movement (KHNAM) State Youth Wing, hadien ba u chairman-cum-managing director (CMD) kane ka kompeni sam ding ka sorkar u Bah PS Thangkhiew um treh ban iakynduh ia ki.
Ha ka jingpynbna ia ka result, ka MeECL ka la bna ba 772 ngut kiba ialeh iaka kam Jugali ki la pass bad la kam ba ka la mynjur ban thung ia ki 336 ngut ha ka bynta ba nyngkong, 233 ngut ha ka bynta baar bad balai.
Hynrei haduh mynta kane ka kompeni kam shym la leh eiei watla ka por jongki, ka la jan kut artad.
Namar ka jingpyneh jong ki Jugali, la pynlong ia u secretary ka MeECL u Debojit Warjri ban mih shabar ban iakren bad u la kular ba ka kompeni kan pyrshang ban pyndep noh ia ka jingpynmih ia ka shithi thungkam sha baroh lashai ka sngi bad kane ka jingkular jongu, ka la pynlong ia kine ki Jugali ban sngew hun bad ban iapra noh na katei ka jaka.
U president ka KHNAM Youth Wing u Bah Thomas Passah uba kyrshan ia kine ki Jugali, u la ong ba lada ka MeECL kam thungkam ia baroh kiba la pass shwa u Nailar mynta u snem, kin sa pynlong ia ka jingiakhih bad ka MeECL ka dei ban shim ia ka jingkitkhlieh.
U la kynnoh ba ka jingslem ban ai shithi thungkam ia kine ki Jugali, ka dei namar ka jingtrei alhia ki briew ka MeECL.
U la pynrem jur ia ka jingleh jong u CMD uba maham ia ki Jugali ban pynlong ia ka jingiakhih tang ban pyntiengkohtympan ia ki ban duh ia ka hok.
“Ka jingkyntait jong u CMD ban iakynduh ka pyni ia ka jinglong ehrang jongu uba pyrkhat ba u dei u kynrad jong ki paidbah ym u shakri paidbah”, la ong u Bah Passah.