U Archbishop ka Colombo, U Cardinal Malcolm Ranjith, ula pynlong mynta ka sngi ia ka jingknia mass, ha ka iingmane kaba don ha syndah jong ka jaka sah jongu hi bad ia katei ka jingknia mass, la pyni paidbah ha ki telebishon bad pynsngew paidbah ha ki radio ha kylleng ka Sri Lanka.
Ki kristan kiba shim bynta na la iing, ha ka por ba pyni paidbah ia ka lehniam knia mass ha Sri Lanka, ba la pyniaid da U Archbishop ka Colombo.
“Ngim lah ban pyniap iano iano ha ka kyrteng jong U Blei, ka la dei ka jingjia kaba sngewsih tam kaba la jia” ong U Archbishop ha katei ka lehniam kniamass, ha kaba la don lang U President katei ka Ri, U Maithripala Sirisena, U myntri rangbahduh, U Ranil Wickremesinghe bad U President barim, U Mahinda Rajapaksa.
Hadien ka jinglehniam, la don ruh ka jingthang mombati ban kynmaw ia kitei ki briew kiba iap bad kiba mynsaw ha ka jinghiar thma ki ehrang. Ka Sri Lanka, ka don 22 million ngut ki briew.
U Archbishop, u iathuh ba ka don ka jingmaham ba kin don biang ki jinghiar thma ha ki iingmane bad kumta u pyntip ba yn nym don ki jingiaseng Sngi U Blei. Ia ki Muslim ruh, la bthah ba kin ia duwai sngi thohdieng, ha la ki jong ki iing namar ba ka don ka jing suba, ba ki dang don kiba thmu ban hiar thma, da kaba pynbthei bom.
Wat la kim don ki jingiaseng, hynrei ki baje ki tied ha baroh ki iingmane lem bad ki jingthang mombai.
Phi don ban ong eiei?