Khang kynsan ka Sorkar, ia ki skul ha Shillong

Babu Kular Khongjirem

Tang mar shu ia wai skul ha kane ka sngi monday,19th April 2021,kumba 4 pm ei ei, kynsan kynsan khlem poi pyrkhat, ka sorkar MDA ha Meghalaya ka la pynbna ban khang noh shwa 14 sngi ia ki skul naduh ki kyrdan barit haduh ki kyrdan class XII ia ki skul kiba don ha baroh ka nongbah Shillong bad ki jaka kiba don markhap jongka.

Kane ka la pynkyndit ia kiba bun ki nonghikai,ki nongpyniaid skul,ki khynnah skul bad wat ia ki kmie ki kpa jong ki khynnah skul kiba la phah skul ban pule ia ki khun ha nongbah Shillong. Ka jingpynbna ka la mih hadien ba la wai skul lut baroh bad khlem pat poi pyrkhat satia.Ha ki katto katne pat ki skul kiba dei ki jaka ialeh Exam. SSLC, bun ki la ioh shuti bad kim ioh satia ban ia kynduh ia ki khynnah skul ha katei ka sngi..Wat la ki bor skul ki hap ban kohnguh ia ka jingpynbna sorkar(official Notification),hynrei ki don pat katto katne ki mat ba ka sorkar ka dei ban pyrkhat bha ha shwa ba kan pynjari ia kum kane ka jingkhang skul kaba kyndit kyndit.

Ka jingpynbna kaba shu khala khala(with immediate effect) khlem da pyntip ne iathuh lypa ka la buh ha ka jingeh,ka jingartatien bad jinglyngngoh lut ia ki nonghikai,ki khynnah skul bad wat ia ki kmie ki kpa jong ki khynnah baroh.Ha ka jingshisha,ka sorkar ka la dei ban ai por shwa shi sngi ei ei, kata, ha ka 21st April 2021 ba ki nonghikai kin ioh ia kynduh shwa ia ki khynnah skul khnang ba kin ioh bthah ia ki jingdonkam baroh.Ki khynnah ruh kumjuh kin ioh lad ban kylli bad wad jingshai na ki nonghikai ia baroh ki jingartatien jongki.

Hadien ba la ailad shi sngi ban pynlong skul,kata,ha ka 20th April 2021(Teusday)ka jingkhang skul kan sdang noh naduh ka 21st April 2021(wednesday) ter ter haduh ar taiew kam lei lei shuh kata.Ka jinglong jingman kam da long kyrkieh eh haduh katta katta kat haduh ban khang skul noh khala khala namar wat ki iew ki hat ruh ki dang shah ban plie,ka MBOSE Exam ruh dang shah ban pynlong kumba la buh. Hynrei ka jingkhang ia ki skul kynsan kynsan, ka la buh jingeh ia ki bor pyniaid skul,ki nonghikai ban leh bad pyntreikam kumba kwah ne bthah ki bor sorkar.Namar ban shu bthah na jrong ka suk bha,hynrei ki nonghikai bad ki skul pat kiba long ki nongpyntreikam ia ka hukum ne ka jingkwah ka sorkar,kam dei satia kaba suk ia ki.

Ka sorkar ka dei ban pyrkhat ia kiba trei ha lyngkha(field) ym dei ban shu hukum tang na suin ba kane ka pyrthei kam long satia kaba jlih kumba ki mut dur kiba heh na jrong. Sa kawei pat ka jingeh na kane ka jingkhang ia ki skul kiba don tang ha sor Shillong ka long ba,ki khynnah skul kiba pule ha sor Shillong ki la duh jinghikai ne duh jingmyntoi noh katba ki skul kiba don sha ki jaka nongkyndong pat kim ktah ei ei.Kata ka mut,ki skul ha Shillong ki shitom ban pyndep ia ki lynnong ba la buh( courses) katba ki skul kiba don ha ki jaka nongkyndong pat ki lynnong (course)kim ktah ei ei hynrei kin iaid beit khlem jingpynthut.Lada kane ka jingkhang skul tang ha Shillong kan iai bteng, ki jingkylli SSLC Exam ruh kin long noh ar jait,kawei ka jingkylli na ka bynta ki skul kiba don ha Shillong namar kin lah pyndep ia ki lynnong (course) bad kawei pat ka jingkylli kan long ia kito ki skul kiba don shabar jong ka Shillong.

Kan long kaba lah shiliang lada kijuh ki jingkylli kin jubab ki khynnah ia kiba long skul bad kito ki khynnah ki bym long skul.Ka sorkar ka dei ban pyrkhat bha shwa ban rai ne leh ia kiei kiei kiba lah ban ktah lang solonsar.Lada ka sorkar ka shu leh kyrkieh ne bam jakhluit bad kam da pyrkhat sani bha bad leh katba mon, ki jingeh kin mih bad ktah kylla hi ia ka sorkar.Ka sorkar kam dei pat ban tei pop ia kiwei pat lada ka leh bakla hi,hynrei kan shim ka jingkitkhlieh baroh sha lade.