Shillong: Katba ki nongialam bad ki dkhot ka FKJGP ki dang khynra laisen khaïi (Trading License) ha Upper Mawprem kynsan kynsan ki pulit jong ka Jhalupara Out Post, ki la wan ban pynsangeh ia ki bad u OC jong ka Jhalupara Out Post, u la kylli la ki la ioh bor naei ban leit khynra dukan bad ki la jubab ba ki dei ki sengbhalang bad ki la dep pyntip sha ka District Council ba kin leit ban khynra laisen khaïi ha ki dukan jong ki bar jylla.
Ki nongialam ka FKJGP kiba dang ia pyni nia bad u OC ka Jhalupara Out Post: Rupang
Hynrei ki pulit kim shym la ailad ia ki ba kin bteng ia ka jingkhynra laisen, wat hapdeng ka jingiapyni nia bad ki la ong ba lada ki ioh ia ka jingbit ki bor jong ka District Council ki la dei ban synran lang ia ki bad lada ki la ioh jingbit wat ki pulit ruh ki lah ban synran lang ia ki. Katei ka la jia ha ka por 2:30 baje eiei nohphai sngi bad nangtei ki dkhot ka FKJGP ki la sangeh syndon ka jingkhynra laisen mynta ka sngi. Ki dkhot ka FKJGP ki la leit ban khynra laisen hapoh ka jingialam jong u President ka East Khasi Hills u bah Elton Warjri bad u President ka Mawprem Circle u bah Reginald Thabah. Hynrei shuwa ban shah khang ha ki pulit, ka FKJGP ka la dep ban khang kumba 20 tylli eiei ki dukan ha Garikhana bad katto katne tylli ha Jhalupara.
Haba kren sha ki nongthohkhubor u bah Elton Warjri, President ka East Khasi Hills u la ong ba shuwa ba nkhynra laisen ki nongialam katei ka seng ki la dep ban ia kynduh ia u CEM ka KHADC u bah Pynshngaiñ N Syiem bad ki la ia kren ruh ia u EM ba peit ia ka tnad khaïi pateng u bah Neil Antonio War ba un phah ia ki pulit District Council ba kin synran lang hynrei u la ong ba u EM u la jubab ia ki ba um treh ban phah pulit ban synran ia ki, “U EM Incharge u ong ba um lah ban phah Enforcement, ngi ruh ngi iaid la ka kam shakhmat” ong u bah Elton.
Shuh shuh halor katei ka jingshah pynsangeh, ki nongialam ka FKJGP ki la ong ba ki pulit ki leh ia la ka jong ka kamram bad katei ka seng ruh ka leh ia la ka kamram bad u la ong ba kane ka dei ka sien ba nyngkong ba ki sdang ban khynra laisen khaïi bad kin iai bteng ha kylleng ki jaka ka sor Shillong bad ka jingshim jong ki ia katei ka sienjam ki ong ba ka dei ba kin pyni sha District Council ba ki leh ia ka kamram ba ka District Council ka dei ban leh hynrei ka bym shym la leh pat ia la ka bynta ba ka dei ban leh. Ki la ong ba kin leit ban ia kynduh ia u CEM ha kine ki sngi ban wan ban ia kren ia kane.