Khang ki paidbah ia ka surok Bypass

Nongpoh,
19 Jymmang: 
Mar ia iohi ba ki kali ki la iaid ha surok bah Shillong Bye Pass, mynta ka sngi ki paidbah nong shong shnong na kumba 22 tylli ki shnong ka thain Umiam  ter ter haduh Umroi ki la iamih paidbah khrui rui rui bad kynthei bad shynrang ban khang ia ki kali.
Kane ka jingmih ki paidbah ka long ba ki kali Tripura, Mizoram, Silchar bad kiwei kiwei kiba wan na Guwahati ki la iaid ha surok kaba long ka jingpynkhein ia ka pakhang shnong ba la khot da ki dorbar ki rangbah shnong ka Ri-Bhoi district ban pyrshah ia ka ordinance ka sorkar halor ki rangbah shnong.
Namar kane ka jingjia, ka la pynlong ia ki pulit jong ka Ri Bhoi bad ki majistor ban hiar kyrkieh bran bran sha katei ka thain ban tem ioh mih kano kano ka jingjia ba sngewsih. Hynrei ki paidbah kynthei bad shynrang ki la pyneh triang ia ka jinghukum ki pulit bad ki majistor ban nym khang lad ia ki kali haduh ba ka kut ha ka jingjop jong ki paidbah.
Kane ka pakhang shnong ka dorbar ki rangbah shnong ka Ri-Bhoi ka long kaba jop namar ba baroh ki surok bah, ki iew ki hat bad ki kali ki la kynjar jar jar kumba long ha ka por mynmiet.
Ka Dorbar ki Rangbah Shnong Ri Bhoi District ki la khot ia ka pakhang shnong kaba 12 kynta ha kane ka district ka long halor ka jingpyrshah jong ki ia ka Ordinance kaba la pynlait da ka sorkar jylla hapoh ka jingialam jong ka MUA-II bad ruh ban dawa pynlong ain noh mardor ia ka Village Administrative Bill kumba la phah da ka KHADC sha ka sorkar naduh u snem 2014.
Ki ophis sorkar ruh ki thylli kren kreng ha kane ka sngi wat ha ka jingshisha na ka liang ka Deputy Commissioner   ka district ka Dr. Pooja Pandey  ka la pynjari 144 Cr PC bad mana ban pep trei ha kane ka sngi.