Shillong 11 Lber: Ki Dkhot ka Khasi Student Union (KSU) ki la khang shisyndon ia ki kali heh sorkar ki ba wan da ki kali remdor bad ia ki kali pulit ban rung sha iing dorbar thawaiñ ka Jylla lyngba ka lad ha Garrison Bridge.
Kane ka jingkhang ka seng ia kitei ki kali sorkar kadei hadien ba na ka liang ki bor pulit kim Shah ia ki ban leit tur sha iing dorbar thawaiñ ka jylla, ha kaba ki la Shah pynsangeh noh ha katei hi ka jaka.
Kumta baroh ki Dkhot ka seng ki la iengiakhih ha katei ka jaka,namar ka jingbymshah tur shapoh, bad kumba ki pulit kim Shah ia ki,ma ki ruh kin nym Shah ia ki kali heh sorkar ban rung na Kato ka jaka sha iing dorbar,da kaba phah rung na kawei ka surok.
Kane ka jingiakhih ka KSU kadei halor ban pyrshah jur ia ka jingwanrah u myntri rangbah ka Jylla u Conrad Sangma ia ka Meghalaya State Investment Promotion & Facilition Act (MSIPF), da ka ba ong, ba kane kadei ka aiñ ban pyniap ia ka Meghalaya Land Transfer Act bad ka 6th Schedule.
Ym tang katta ka seng ka la pyrshah jur ruh ia ka jingthmu ka sorkar jylla, ban wanrah ia ka lynti rel hapoh ka Jylla, namar lyngba kane ka lynti rel ki nongwei kin sa wan rung kyrthep sha ka bri u Hynniewtrep.
“Bad ruh ka seng ka ong, ba lada ka sorkar kam pat lah ban wanrah ia ki ain ban ia da na ka jingwan rung kyrthep ki nongwei, ym dei ban wanrah lynti rel”.
Kane ka jingleh ka seng ban khang shisyndon ia kitei ki kali, kadei namar ka jingbitar ba kim Shah rung ia ki Dkhot ban leit tur sha iing dorbar thawaiñ ka Jylla, da kaba ker syrtap ia katei ka lynti iaid.
Phi don ban ong eiei?