Khang ka HYC ïa ki Bank ha Nongpoh, namar ba kim burom ia ka ‘Shad Nongkrem’

Nongpoh:Ki dkhot ka Hynniewtrep Youth Council (HYC), mynhynnin ka sngi ki la leit ban khang khyrdep ia ki katto katne tylli ki Bank kiba don ha Nongpoh, kata hadien ba ki la lap ba kitei ki Bank kim shym la burom ia ka shuti ‘Shad Nongkrem’, kaba baroh ki tnat trei kam hapoh ka Ri lum Khasi ki sangeh trei namar ka jing pynban shuti da ka sorkar.

Haba kren sha ki lad pathaikhubor, ki nongialam bad ki dkhot jong ka HYC, ki la ong ba ka nongrim kaba la pynlong ia ki ba kin leit khang ia kitei ki Bank, ka dei hadien ba ki la iohi bad lap ba kitei ki Bank, ki plie beit bad ki pyniaid beit ia ka jingtreikam bad ba ki khlem burom satia ia ka ‘Shad Nong krem’.

Hadien katei ka jingleit khang khyrdep ia kitei ki Bank, na ka liang ka HYC, ki la kyntu ia ki nongpeit jong kitei ki Bank, ba kim dei ban treikam ha ka sngi ‘Shad Nong krem’ bad ba ki dei ban ai shuti.
Na ka liang ki nongialam ka HYC, ki la kyntu ia ka sorkar jylla, ba nangne sha khmat ba ka dei ban ai shuti ia ki Bank, kaba long kum ka dak ban burom kaba mar kyl liang ia ka ‘Shad Nongkrem’.