Khang ka FKJGP Mawhati ia ki bar jylla ban wan shong Iew ha ki thain Umtrai

Nongpoh: Kum kawei na ki lad jingiada na ka bynta ban khang ia ka jingsaphriang u khniang Jingpang ‘Corona Virus’, na ka liang ka FKJGP Mawhati Circle, ka la khang lynti bad kim shah shuh ia ki bar jylla na Assam ba ki wan shong Iew hapoh ka Iew Umtrai ha Ri Bhoi.

Haba iadei bad katei ka jingbym shah shipor ia ki bar jylla ba kin wan shong Iew ha katei ka Iew Umtrai, u Bah Shanlang Diengdoh, u la ong ba ka nongrim kaba la pynlong ia ka seng ba kan shim ia katei ka sienjam, ka long kum kawei na ki lad ban tehlakam ia ka jingsaphriang u khniang jingpang ‘Corona Virus’, namar hapoh katei ka iew ki bun bha ki bar jylla kiba wan ban shong Iew.

Na katei ka jingbymshah ia ki bar jylla ba kin wan sha katei ka jaka, na ka liang ka seng ka la pynphai kylla ia kito ki bar jylla, kiba la thmu ban wan shong Iew ha Iew Umtrai bad Sonidan lem bad kiwei kiba thmu ban rung sha kiwei de ki jaka.Kumta haba iadei bad katei ka sienjam, kaba la shim da ka seng, utei u nongialam ka FKJGP, u la kyntu ia kiwei pat ki briew ba kin ai ka jingiatreilang, hynrei na bynta jong kito kiba leh pyrshah, na ka liang ka seng hi ka la shim beit ia ka rai ban beh beit ia ki.