Shillong: U Deputy Commissioner & Returning Officer, District Council Election, East Jaintia Hills District ha ka khubor ba la pyllait, la bthah ba kat kum ka Section 126 jong ka Representation of the People Act, 1951, ki kam ialap election ha kaba ia dei bad ka election sha ka Jaintia Hills Autonomous District Council 2019, kan kut noh ha ka 25.02.2019 ha ka por 4:00 baje janmiet. Hadien kane ka por, la mana bad khang pyrshah ban pynlong ka ialap election ha kino kino ki rukom, kum ka jingialang paidbah, ka jingpynmih ia kino kino ki kam kiba ia dei bad ka election kiba ktah ia u ne ka Nongthep Vote ha ki kot khubor ne telibishon (Print & Electronic), ka jingkanbas da kaba leit man ki thliew iing briew bad kiwei kiwei de, ha baroh ki District Council Constituency kiba don hapoh ka District.
Lada don U/Ka briew kaba pynkhein ia kine, yn shah pynshitom kat kum ka ain, da kaba shah set phatok ar snem kynthih lane shah dain kuna lane baroh ar.
U Deputy Commissioner & Returning Officer, District Council Election, East Jaintia Hills District, sa shisien ula ban jur hangne ba ki TV/Radio bad ki cable TV, kim dei ban pyllait ne shah ne pynmih prokram kiba ia dei bad ki apil ne jingiatai ne ki jingiakren na ka bynta u ne ka Candidate na kano kano ka Political Party kaba lah ban ktah ia ka election ne rukom thep vote jong u ne ka nongthep vote.
Phi don ban ong eiei?