Khang dih sikret ha Iewduh

Shillong, 21 Jylliew:
Ka MDC ka seng HSPDP na Mylliem Konstitwensi ka kong Teilinia Thangkhiew ka la wanrah ia ka mat ia kren (Motion) mynta ka sngi ha ka dorbar lyiur ka KHADC da kaba kyntu ia ka Executive Committee ka District Council ba ka dei ban khang noh shi syndon ia ka jingdih duma sikret ha Iewduh. Ka kong Teilinia ka la ong ba ki la mih bun ki jingujor bad ka la ong ruh ba ka ktah ia ka koit ka khiah ki paidbah nongwan iew khamtam kito ki longkmie kiba rah bad ki khyllung rit jong ki.
Ka la kren hapoh ing dorbar da kaba ong ba katkum ka Census jong u snem 2009 ki don haduh 9 lak ngut kiba iap ha ka shisnem tang na ka daw ka jingdih duma bad ka la ong ruh ba ka jingdih duma ha jaka paidbah kam pynsniew tang ia u nongdih hynrei ka ktah ruh ia kiwei pat kiba ring mynsiem ia katei ka lyer duma. Ka MDC na Mylliem ka la ai jingmut ia ka Ec ba ka dei ban shimkhia noh ia katei ka kam da kaba pynmih da ka jingpynbna bad ban daiñ kuna ia kiba leh pyrshah bad katei kan tynrong ruh ha ka jingpynmih pisa ka KHADC.
Haba pynshai ia katei ka mat ba la wanrah da ka MDC ka Mylliem, u EM ka KHADC u bah Hadrian Lyngdoh u la kubur ba ka jingdih duma ha ki jaka paidbah ka dei ruh ka aiñ kaba la don lypa bad u la ong ba ka KHADC shen kan sa khot noh ia u Syiem ka Hima Mylliem ba u dei ban shimkhia ba kin ym don shuh ki nongdih sikret lyngkar ha Iewduh. U bah Hadrian u la ong ruh ba ka KHADC kan pyrshang ban buh da ki pulit pahara ban bat ia kito kiba pynkheiñ ia katei ka aiñ ha kaba kin daiñ kuna ruh ia ki. Utei u EM ka KHADC u la ong ba ki shynrang kiba dih sikret ruh ki dei ban shim ka jingkitkhlieh ba kin pynduh noh ia katei ka jingmlien jong ki ban dih sikret ha ki jaka paidbah.