Khang dam ki bank bad petrol pump ha Garo Hills

Shillong, 12 Nailar:
Ka rilum Garo Hills kan kynduh ia ka jingeh haba ki bank bad ki petrol pump ki la khang dam ban pyrshah ia ki kam pyntriem kiba la kynrei ha ka thain, naduh ka kam rahbor, pyniap bad ka jing lute bad dawa pisa.
Kane ka jingkhang kdam ka long hadien ba uwei u nongtrei u la shah siat iap mynta ka sngi bad ki nongrahbor ia u nong trei ka State Bank of India (SBI) u Subodh Ku mar Misra ki la dawa biang sa T. 50 lak ban pynlait ia u.
Baroh ki bank ha Garo hills ki la iasoh bad ka SBI ban pyrshah ia ka jingshah rahbor ia u Mish ra, uba shah rahbor na Gasuapara ha South Garo hills ha ka 5 tarik Nailar.
Ki nongrahbor ki la dawa T. 50 lak ban pynlait ia u Mishra. Ki nongtrei jong ka SBI na ki 41 tylli ki tnad ha Garo hills ki la mih paidbah ban iaid ban pyrshah ia ka jingshah rahbor na madan Chandmari.
“Ka jingkhang kdam khlem buh por jong ka SBI ha Garo hills kan bteng nalor ki ATMs kin nym treikam bad kiwei ki bank ruh ki la rai ban khang kdam halor kane ka jingjia”, la ong u Nixon Joseph u assistant general manager (Garo hills division) ka SBI.
“Ngim donkam suloi, bom ban wanrah jingsuk, ngi dawa ban pynlait noh ia u Subodh Kumar Mishra”, sangeh noh ka jingrahbor shi syndon. Ngi don hangne ban shakri ia phi paidbah”, la thoh ha ka jingiaid paidbah.
La iathuh ba kiba haiing u Mishra ki la siew T. 5 lak sha ki nongrahbor ban pynlait ia u hynrei kim sym la pynlait bad ki la dawa sa T. 50 lak. Kham mynshwa ki la dawa T. 1 klur hynrei la pynhiar sha ka T. 10 lak kham mynshwa.
Ki nongtrei jong ki bank ki la iathuh ba ha kane ka sngi Hatmajai, ki nongrahbor ki la dawa sa T. 50 lak ban pynlait ia u Mishra.
U SP ka South Garo hills u Bah Lakador Syiem u la ong ba ki pulit kim pat lapdien ia u Mishra bad ki dang pynlong ia ka jingthwet kaba jur.
U Myntri rangbah ka jylla u Mukul Sangma u la ong ba ka jingrahbor ia u nongtrei ka bank, ka dei ka jingkutlad jong ki kynhun pyntriem.
Ki paidbah ka thain Garo ki la ud namar ba kim lah shuh ban iaid ban ieng namar ka jingkhang jong ki petrol pump namar ka jingpyrshah jong ki petrol da kaba khang kdam namar ka jingshah pyniap jong u nongtrei ka petrol pump u Bittu Patel ha kane ka sngi Hatmajai.