Khang Bank ka RBYF ha Umsning

Nongpoh, 04 Jylliew:
Wat haba u DC ka Ri-Bhoi u la pynbna shuti kyrpang ia ka Ri-Bhoi District hynne ka sngi, ha baroh kawei ka District, pynban ki Bank ha Umsning ba kynthup naduh ka Meghalaya Coorporative Apex Bank, Umsning Branch, ka State Bank of India (SBI), Umsning Branch, ka Meghalaya Rural Bank, Umsning Branch bad ka United Bank of India (UBI), Umsning Branch, kim shym la ai shuti satia ia ki nongtrei ka Bank, wat haba la pynbna ba ka dei ka sngi shuti kyrpang.
Kumta na ka liang ka RBYF Umsning Circle, hapoh ka jingialam u Bah P.P Kylla, President ka seng, ki la leit ban khang ia kitei ki Bank bad baroh ki nongtrei na kitei ki Bank ki la mih noh hynne ka sngi, ban leit sha la ki iing ki sem.
U President ka Ri-Bhoi Youth Federation (RBYF), Umsning Circle, u Bah P.P Kylla, haba iakren bad u nongthoh khubor hynne, u la ong ba balei ki Bank hangne kim burom ia kane ka sngi shuti ba la ai kyrpang ha ka District baroh kawei. Ha kaba iadei bad kane, u la kyrpad ia u DC ka Ri-Bhoi ba un pynbna shuti ia ki Bank ruh, nangne shakhmat ha ki snem ban wan, namar baroh ki ophis sorkar, ki skul bad ki kolej ki la khang lut hadien ba la mih ka hukum na u DC ka District ban ai shuti.