Kham sted u 108 ban ia u 100 ki pulit, ong u IG

Shillong, 9 Nohprah:
U Inspector General Police (IGP) u GHP Raju, u la ong ki pulit kidei ban long kiba kloi bad kiba sted ban jubab haba ki paidbah ki pan jingiarap lane ki phun. Hynrei kaba sngewsih ka long ba ki donbun ki khep ha kaba ki nombor 100 ba dei jong ki pulit kim ju iaid kam tikna.
Une u heh pulit u la ong ba katkum ka jingtip ne ka recod u nombor 108 ki ju kham sted ban kloi shibun ban ai jingiarap ia ki paidbah kiba donkam.
“Kumba 98 percent ki briew jong ka 108 ki shim ia ka phun mar ia phun bad 99 percent ki shim ia ka phun ha ka sien kaba ar katba u nombor 100 ba dei jong ki pulit lada phun teng teng um ju ioh bad ka kompeni ka ju jubab bym siew bill phun”, la ong u Raju haba kren ha ka jingplie iaka website jong ki pulit ka East Khasi Hills hynne ka sngi ha Police Headquater Shillong. U Raju u la kyntu ba kum ki pulit kidei ban sted ban jubab ne leh ia kano kano ka kam haba ki paidbah ki pyntip ne pan jingiarap.U la ai nuklsa ba ki pulit jong ka Mumbai haba don kano kano ka jingjia ki poi beit hapoh ka hynniew minit hynrei ha kane ka jylla jong ngi teng teng ka shim por kumta shi kynta ba ki pulit kin poi.
Halor kane na ka liang u Raju u la kyntu ia ki pulit ba kin long kiba tbit bad ki ba kloi ha ka rukom shakri ia ki paidbah bad u la kyrmen ba lyngba ki jingshim khia jong ka sorkar kan sa urlong. U Raju u la iathuh ruh ba ka jingpyndait ia ka CCTV camera yn pyndep ha shwa ka kristmas ha ki hynriew tylli jaka jong ka nongbah Shillong ba don 28 tylli baroh.
Ha kane ka sngi ia kane ka website Shillong police.gov.in la plie da u Director General of Police (DGP) u PJP Hanaman ba ladon lang ki Rangbah shnong ka sor Shillong bad khap sor ha ka jingialang kba la pyniaid da u SP ka East Khasi Hills. Haba kren ha kane ka jingplie u DGP u la ong ba ka jingdon jong kane ka website kan iarap ia ki paidbah ba tip ia ki kam jong ki pulit ka East Khasi Hills bad ia ki jingtip ba donkam khamtam ha ka nongbah Shillong.
U la ai jingiaroh ia u SP ka East Khasi Hills uba la shim ia kane ka synjam. Katkum ka jingong jong u DGP u Myntri rangbahduh ka ri u Narendra Modi ha ka jingialang ba dang shen bad ki heh Pulit u la ong ba man ki Police station kidei ban don ka website ha ka ri baroh kawei. Ha kane ka sngi la ioh ruh ka jingkren na u SP Crime bah Vivek Syiem bad u bah Toki Blah.