Shillong: U myntri rangbah ka jylla u Dr.Mukul Sangma u don ki spah ki phew kiba kot haduh T.1,43,75,433 klur tyngka. U Dr.Mukul u don lai tylli ki kali bad u don ruh ia ka pistol .32 NP kaba shongdor T.80 hajar tyngka. U don 6 tylli ki jaka kiba long ban rep bad ar tylli ki bym long ban rep, u don ar tylli ki ing paki dulan bad ka spah kaba T.1,55,00,000 klur tyngka. U Dr.Mukul un ia khun mynta na ki ar tylli ki konstitwensi ka Ampati kaba u mihkhmat mynta bad ka Songsak konstitwensi kaba mihkhmat da u MLA ka NPP u Nihim D Shira.
Hynrei ban ia u Dr.Mukul dang kham riewspah shuh shuh ka lok jong u ka Dikanchi D Shira bad katei ka don ka spah ka phew kaba haduh T.2,09,27,481 klur tyngka kaba pyni sha ka tnad elekshon. Ka don 26 tylli ki jaka ba long ban rep bad sa 10 tylli pat ki jaka ki bym long ban rep ryngkat ka spah kaba T.8,11,00,000 klur tyngka.